Ижтимоий тармоқларда Монополияга қарши курашиш қўмитаси Тошкент бозорларидаги аравакашлар фаолиятини тартибга солмоқчилиги ҳақида хабарлар тарқалди. Қўмита мазкур ҳолатга муносабат билдириб, аравакашлар фаолиятини тартибга солиш ва ўрганиш ўтказиш режалаштирилмаганини маълум қилди.
Монополияга қарши курашиш қўмитаси Тошкент шаҳар бошқармаси бошлиғи Жўрабек Туробов пойтахт кенгашида чиқиш қилиб, бозорлардаги аравакашлар хизмати учун тўловни терминаллар орқали тўлаш тартибини жорий этиш ва улар оладиган ҳақ учун тарифлар белгилашни таклиф қилган.
Қўмитанинг маълум қилишича, ижтимоий тармоқлар орқали тарқалган видеотасвирдаги ҳолат Халқ депутатлари Тошкент шаҳар кенгашининг жорий йил 7 март кунидаги 58-сессиясида бўлиб ўтган.
Халқ депутатлари Тошкент шаҳар кенгашининг депутатларидан бири 2022 йил 25 февраль куни Тошкент шаҳар Халқ депутатлари кенгашининг 57-сессиясида Монополияга қарши курашиш қўмитаси Тошкент шаҳар ҳудудий бошқармасига Тошкент шаҳри бозорларидаги арава хизматлари ва кўрсатилган хизмат учун ҳақ олиш юзасидан масалани ўрганиш топширилган. Монополияга қарши курашиш қўмитаси Тошкент шаҳар ҳудудий бошқармаси бошлиғи Жўрабек Туробов мазкур масалани ўрганиб, тасвирларда кўрсатилганидек ҳисобот берган.
Бундан ташқари, бозорларда истеъмолчилар ҳуқуқларини ҳимоя қилиш ва уларга қулайликлар яратиш мақсадида бозорлар маъмуриятлари томонидан араваларни ижарага бериш вазифаларини такомиллаштириш юзасидан у ўз фикрларини билдирган.
«Республикамиз бозорларида савдо фаолиятини ташкил этиш ва хизматлар кўрсатиш Вазирлар Маҳкамасининг 2012 йил 28 августдаги 253-сон қарори билан тасдиқланган «Ўзбекистон Республикаси бозорларида савдо фаолиятини ташкил этиш» қоидаларига мувофиқ амалга оширилади. Мазкур қоидага мувофиқ бозорни бошқариш бозор маъмурияти томонидан амалга оширилади, унга ушбу қоидалар ва бошқа қонун ҳужжатлари талабларига риоя қилиш учун жавобгарлик юкланган. Қўмита томонидан аравакашлар фаолиятини тартибга солиш ва ўрганиш ўтказиш режалаштирилмаган», — дейилади муносабатда.
Изоҳ (0)