Навоийда мансабдорнинг хизмат фаолиятига оид маълумотларини интернетда тарқатиш билан таҳдид қилиб, 1500 доллар олган шахс қўлга олинди. Бу ҳақда «Дарё»га вилоят ИИБ ахборот хизмати раҳбари Ўктам Усмонов хабар берди.
2022 йилнинг 9 март куни Навоий шаҳрида яшовчи 32 ёшли фуқаро Н.Н. вилоят ИИБ бошлиғига ариза билан мурожаат қилиб, таниш аёл Д.Б. унга хизматга оид маълумотларини интернет орқали тарқатиш билан таҳдид қилаётганини билдирган. Унинг сўзига кўра, Д.Б. 4 март куни ундан товламачилик йўли билан 3 миллион сўм пул олган. Орадан бир неча кун ўтгач, яна таҳдид қилиб 1500 доллар пул талаб қилган.Д.Б. фуқаро Н.Н. дан 1500 доллар пулни вилоят ИИБ ходимлари томонидан ўтказилган тезкор тадбир вақтида олганда қўлга тушган.
Ҳолат юзасидан вилоят ИИБ томонидан Д.Б.га нисбатан Жиноят кодексининг 165-моддаси 1-қисми (товламачилик, яъни жабрланувчи ёки унинг яқин кишиларига зўрлик ишлатиш, мулкка шикаст етказиш ёки уни нобуд қилиш ёхуд жабрланувчи учун сир сақланиши лозим бўлган маълумотларни ошкор қилиш билан қўрқитиб ўзгадан мулкни ёки мулкий ҳуқуқни топширишни, мулкий манфаатлар беришни ёхуд мулкий йўсиндаги ҳаракатлар содир этишни талаб қилиш ёхуд жабрланувчини ўз мулки ёки мулкка бўлган ҳуқуқини беришга мажбур қиладиган шароитга солиб қўйиш) билан жиноят иши қўзғатилиб, тергов ҳаракатлари олиб борилмоқда.
Изоҳ (0)