КХДР етакчиси Ким Чен Ин Сохе космодромига ташриф буюриб, уни модернизация қилиш бўйича топшириқ берди. Бу ҳақда Шимолий Корея Марказий телеграф агентлигига таяниб, Yonhap агентлиги хабар берди.
Маълум қилинишича, Ким Чен Ин космодромнинг учиш майдончасини реконструкция қилиш ва янги объектларни қуриш вазифасини қўйган. Агентлик маълумотларига кўра, келажакда космик аэродромдан кўп мақсадли сунъий йўлдошли ракеталарни, жумладан, ҳарбий разведка сунъий йўлдошларини учиришда фойдаланиш режалаштирилмоқда.
Аввалроқ Шимолий Корея минтақадаги АҚШ ҳарбийлари ҳамда уларнинг «вассал кучлари»ни кузатиш ва уларга оид маълумотларни тўплаш мақсадида сунъий йўлдош яратиши маълум бўлганди.
5 март куни КХДР разведка сунъий йўлдоши тизимининг навбатдаги синовлари доирасида баллистик ракеталарни учирган — 2022 йил бошидан буён бу Шимолий Кореянинг тўққизинчи маротаба ракета учириши ҳисобланади.
Январь ойида АҚШ Шимолий Корея ракеталарини учириш частотаси ортиб бораётгани сабабли Бирлашган Миллатлар Ташкилоти орқали янги санкциялар жорий этишни таклиф қилганди, чунки ҳар бир учириш Хавфсизлик Кенгаши резолюцияларини бузади. Бундай санкциялар биринчи марта 2006 йилда киритилган. Улар Шимолий Кореяга ракеталар, материаллар ва уларни ишлаб чиқариш учун зарур технологияларни олиб кириш ва олиб чиқишни тақиқлашни назарда тутган. Кейинчалик чора-тадбирлар комплекси кенгайтирилган.
Изоҳ (0)