Фарғонада аёл икки нафар қизи билан Катта Фарғона каналига чўкиб кетгани, қизлардан бирининг жасади топилгани, она ва унинг иккинчи қизини қидириш ишлари давом этаётгани тўғрисида хабар берилганди. Фарғона вилояти прокуратурасининг маълум қилишича, ҳолат юзасидан жиноят иши қўзғатилган.
Маълум қилинишича, Риштон туманида яшовчи фуқаро Г.Н. 21 февраль куни вояга етмаган фарзандлари Ш.Х. ва И.Х. билан яшаш хонадонидан номаълум томонга чиқиб кетиб, бедарак йўқолган.
Қидирув тадбирлари давомида, ушбу куни вояга етмаган Ш.Х.нинг мурдаси Катта Фарғона каналининг Бағдод туманидан оқиб ўтган қисмидан топилган ва тегишли экспертизалар тайинланган.
Мазкур ҳолатда бедарак йўқолган фуқароларни қотиллик қурбони бўлиши мумкинлигини инобатга олиб, ушбу ҳолатни келгусида тергов йўли билан текшириб, аниқлик киритиш мақсадида Жиноят кодекснинг 97-моддаси (қасддан одам ўлдириш) билан жиноят иши қўзғатилган.
Ҳозирда Фарғона вилояти прокуратураси томонидан дастлабки тергов ҳаракатларини ўтказиш билан бир қаторда, бедарак йўқолган Г.Н. ва унинг бир нафар фарзандини топиш юзасидан барча тезкор-қидирув тадбирлари амалга оширилмоқда.
Бундан аввал Андижонда жонига қасд қилган набирасини қутқариш учун ўзини каналга ташлаган отахоннинг жасади 9 кун ўтиб топилгани ҳамда Андижонда 65 ёшли эркак ва унинг 18 ёшли набираси каналга чўкиб кетгани ҳақида хабар берилганди.
Изоҳ (0)