Украина президенти Владимир Зеленский мамлакатдаги ҳарбий ҳолат даврида барча аҳолига қуролдан фойдаланиш имконини берувчи қонунни имзолади. Бу борадаги тегишли ҳужжат Олий Рада сайтига жойлаштирилган.
Таъкидланишича, гап ов, спорт ва ҳарбий хизматчиларга совға қилинган қуроллар ҳақида кетмоқда. Бунда, фуқаролар «Украинага қарши қуролли тажовузни амалга ошираётган шахслар»га қарши қурол қўллагани учун жавобгарликка тортилмайди.
«Ҳарбий ҳолат даврида Украина фуқаролари ўзларига совға қилинган қуроллар, спорт қуроллари (пистолетлар, револвер, милтиқлар), ов қуроллари, силлиқ стволли ёки қўшмилтиқларда, шунингдек, уларга мўлжалланган ўқ-дорилардан фойдаланган ҳолда қаршилик кўрсатишлари мумкин», — дейилади ҳужжатда.
Мазкур қонун кучга кирган ва бутун ҳарбий ҳолат даврида амал қилади.
Tengrinews нашрининг ёзишича, ушбу қонун қабул қилинишидан олдин Украинада аҳолига жанговар қуролларни тарқатиш бўйича қарор қабул қилинган. Бу Украина ҳукумати томонидан назорат қилинадиган шаҳарлар кўчаларида ўзбошимчалик тўлқинини келтириб чиқарган.
Эслатиб ўтамиз, 25 февраль куни Зеленский умумий сафарбарлик тўғрисидаги фармонни ҳам имзолаганди. Ҳужжат Украина президентининг расмий сайтида эълон қилинган. Сафарбарлик Россиянинг ҳарбий аралашуви билан асосланади. Фармон кучга кирган кундан бошлаб 90 кун ичида уни Украинанинг барча ҳудудларида қўллаш топширилган.
Россия—Украина урушига оид тезкор, ишончли янгиликлар ва маълумотларни Дарйўнинг ливе саҳифаси орқали кузатиб боринг → @Daryo_Live
Изоҳ (0)