3—4 март кунлари Украинадан Польшанинг Катовице аэропорти орқали яна 720 нафар Ўзбекистон фуқароси олиб келинди. Бу ҳақда ТИВ расмий вакили хабар берди.
Шундай қилиб, 4 март ҳолатига кўра, умумий ҳисобда 11 та авиарейс билан 2 579 нафар Ўзбекистон фуқароси ватанга қайтарилган.
Катовице аэропортидан учта қўшимча парвоз кутилмоқда: 4 март куни соат 14:30 ва 16:00 да ҳамда 5 март соат 03:00 да.
Маълум қилинишича, Польша ҳудудида Ўзбекистоннинг 1 480 дан ортиқ фуқароси қолмоқда. Улардан 700 нафари Польша давлат чегарасидаги тўпланиш нуқтасига, 780 нафари эса Катовице аэропортига жойлаштирилган.
Польшадаги Ўзбекистон элчихонасининг маълумотларига кўра, Катовице аэропорти бугунги кунда одамлар билан тўлган. Ўзбекистонлик дипломатларнинг саъй-ҳаракатлари натижасида Ўзбекистон фуқаролари шароитлар яратилган, шу жумладан, улар иссиқ овқат билан таъминланган. Шаҳар маъмурияти томонидан аэропорт биносига кириш ва йўловчиларни рўйхатга олиш учун соддалаштирилган тизимни ишга туширилган. Жамоат тартиби полиция ва маҳаллий кўнгиллилар томонидан назорат қилинмоқда. Болали аёллар ва кексалар учун махсус коридор ташкил этилган. Барча фуқароларга олдиндан тайёрланган рўйхатлар асосида хизмат кўрсатилмоқда.
«Фуқароларнинг ватанимизга тезроқ қайтиш истагини англаган ҳолда барча юртдошларимиздан хотиржамликни сақлашлари, ваҳимага бериласмликлари, провокациялар ва зиддиятли вазиятларга учмасликларини сўраймиз. Ишонтириб айтамизки, барча фуқаролар мамлакатимизга қайтарилади», — дейилади хабарда.
Аввалроқ ТИВ Польша аэропортида Ўзбекистон фуқаролари орасида жанжал ва можаро бўлгани ҳақидаги хабарлар юзасидан изоҳ берганди.
Изоҳ (0)