Тошкентдаги Украина элчихонаси яқинига одамлар юмшоқ ўйинчоқлар, гуллар ва қўллов ҳамда ҳамдардлик маъносидаги турли ёзувлар қолдириб кетмоқда. Бу ҳақда «Дарё» мухбири хабар қилди.
Элчихона остонасида тўрт хил тилда – ўзбек, украин, инглиз ва рус тилларидаги ёзувлар қолдирилган. Унда «Украинага тинчлик», «Биз сиз билан», «Йўқолсин уруш!», «Биз урушга қаршимиз», «Украина, бардам бўл» каби сўзлар ёзиб қолдирилган.
Украинадаги вазият
24 февралга ўтар кечаси Россия президенти Владимир Путин Донбассда «минтақа аҳолисини геноциддан ҳимоя қилиш» учун «махсус ҳарбий операция» бошланганини маълум қилди. Мурожаатдан сўнг ижтимоий тармоқларда Украинанинг кўплаб шаҳарларида портлашлар содир бўлгани ҳақида хабарлар пайдо бўлди. Украина Ички ишлар вазирлиги раҳбари маслаҳатчиси Антон Герашченко 24 февраль куни эрта тонгда Киев, Харков ва Днепрда ҳарбий инфратузилма объектларига ракета зарбалари берилганини маълум қилди.Украина президенти Владимир Зеленский Путиннинг ҳаракатини мамлакатни яксон қилиш дея баҳолаб, Ғарбни «Путинга қарши коалиция» тузишга чақирди.
24 февралда Россия Украинага бостириб киргач, Буюк Британия мамлакатга қарши янги санкциялар қўллаган, хусусан «Аэрофлот» компаниясининг қироллик ҳудудига парвозларини тақиқлаган. АҚШ президенти Жо Байден Россия Украина ҳудудига бостириб киргани ва у ерда ҳарбий операцияларни бошлагани учун мамлакатга нисбатан янги санкциялар жорий қилган. Шунингдек, Байден Россиянинг Украинага ҳужуми учун масъулият Владимир Путиннинг зиммасида экани, Россия ушбу ҳарбий операция учун жиддий зарбалар қабул қилиб олиши ҳақида гапирган.
Ўзбекистон ташқи ишлар вазирлиги Украина ҳудудида 4300 га яқин Ўзбекистон фуқароси борлигини маълум қилган. Улар Польша орқали эвакуация қилинади. 25 февраль куни Шавкат Мирзиёев Украинадаги вазият юзасидан Путин билан фикр алмашди.
Изоҳ (0)