Ўзбекистон мудофаасига кўмаклашувчи «Ватанпарвар» ташкилоти Халқаро кинология иттифоқининг (International Kennel Union) аъзоси бўлди, деб хабар беради Мудофаа вазирлиги матбуот хизмати.
Маълум қилинишича, «Ватанпарвар» ташкилотининг кинология бўйича мураббийлари ҳамда хизматчи итлари сўнгги йилларда МДҲ, Осиё ва жаҳон миқёсида ушбу йўналишда ташкил этилаётган мусобақалар ва кўргазмаларда юқори ўринларга сазовор бўлиб келган.
Хусусан 2022 йилнинг 15−22 февраль кунлари Россия пойтахти Москва шаҳрида ўтказилган зотдор итлар бўйича халқаро кўргазмада «Ватанпарвар» ташкилоти кинологларининг зотдор итлари энг юқори баҳоларини қўлга киритган.
Жумладан, кўргазма экспертлари томонидан Ўзбекистон делегациясининг свергшнауцер, вео, бивер-ёркшир терер, пудел той зотига мансуб итлари тоза наслли ҳамда интеллект жиҳатдан талабга жавоб беради, дея топилиб, уларнинг кинологларига махсус сертификатлар топширилган. Итлар учун белгиланган намунадаги дипломлар тақдим этилган.
Маълумот учун, «Ватанпарвар» ташкилоти, Халқаро аэронавтика федерацияси (ФАИ), Халқаро кемамодели уюшмаси («Навига»), Халқаро триатлон уюшмаси (ITU), Халқаро биатлон уюшмаси (IBU) ҳамда Осиё триатлон конфедерацияси (АСТC)нинг тўла ҳуқуқли доимий аъзоси ҳисобланади.
Эслатиб ўтамиз, «Ватанпарвар» ташкилоти 2021 йилнинг январь ойида Мудофаа вазирлиги тизимига ўтказилганди. 2021 йилда «Халқаро армия ўйинлари» доирасида Жазоирда ўтказилган «Содиқ дўст» мусобақасида ўзбекистонлик ҳарбий кинологлар фахрли 1-ўринни қўлга киритган эди.
Изоҳ (0)