Миллий матбуот марказида «Олмалиқ КМК» АЖ фаолиятида рақамлаштиришнинг аҳамиятига бағишланган матбуот анжумани бўлиб ўтди. Унда комбинатда рақамлаштириш юзасидан амалга оширилаётган ишлар ва режалар хусусида маълумот берилди.
Олмалиқ кон-металлургия комбинати мамлакатимизнинг энг йирик ишлаб чиқариш корхоналаридан бири ҳисобланади. Комбинат конларни очиқ ва ерости усулида қазиш, бойитиш ва олтинни саралаб олиш фабрикалари, металлургия заводлари, йирик энергетика ва транспорт тизимлари, ривожланган инфратузилма ҳамда ижтимоий объектларни бирлаштирган.
Корхона раҳбарияти томонидан ишлаб чиқариш ҳажми ва иш самарадорлигини янада ошириш, техник ва технологик жиҳозларни қайта жиҳозлаш ва модернизация қилиш, янги ишлаб чиқариш объектларини қуриш билан бирга рақамлаштириш даражасини оширишга алоҳида эътибор қаратилмоқда.
«Олмалиқ КМК» АЖ бошқаруви раисининг рақамлаштириш бўйича ўринбосари Абдулла Азизовнинг таъкидлашича, бугунги кунга қадар ОКМКда рақамлаштириш доирасида амалга оширилган ишлар натижасида бир қатор ютуқларга эришилган.
«2021 йилда комбинатда транспортни бошқариш ва назорат қилиш тизими жорий этилиб, лойиҳа доирасида 1700 та транспорт воситаларига масофавий назорат — GPS тизими, шунингдек, барча кон автосамосваллари ҳамда кўчма ёқилғи қуйиш автотранспортларига ёқилғи назорати сенсорлари ўрнатилди. Натижада, 2021 йилда комбинат бўйича қиймати 151 миллиард сўмга тенг бўлган 16,8 минг тонна дизель ёқилғиси тежаб қолинган. Технологик транспорти бошқармасида TIS ахборот тизими жорий этилиши ‘Ёшлик I’ конида тоғ жинсини ташиш ҳажмини ўртача 10 фоизга оширишга имкон берди. Бундан ташқари, саноат темир йўл транспорт бошқармасида RMS ахборот тизими жорий этилиб, ушбу тизим ёрдамида 160 та транспорт воситаси назорат этилиши йўлга қўйилди. Натижада темир йўл вагонларини нормадан ортиқ тўхташлари олди олиниб, жарима тўловлари 6 мартага камайтирилишига эришилди», — деди А. Азизов.
Маълумки, Ўзбекистон Республикаси Президенти Шавкат Мирзиёев томонидан, 2020 йил 5 октябрь куни «‘Рақамли Ўзбекистон — 2030’ стратегиясини тасдиқлаш ва уни самарали амалга ошириш чора-тадбирлари тўғрисида»ги фармон имзоланган. Фармон билан тасдиқланган «Рақамли Ўзбекистон — 2030» миллий стратегияси доирасида комбинат мутахассислари томонидан «Рақамли ОКМК — 2030» ривожланиш концепцияси ишлаб чиқилган.
2022 йилнинг январь ойида концепция доирасида барча кўзда тутилган лойиҳаларни амалга ошириш мақсадида, рақамлаштириш бўйича бошқарув раисининг ўринбосари (Chief Digital Officer) лавозими жорий этилган.
«Президентимиз Шавкат Мирзиёевнинг 2021 йил 22 декабрь куни Олмалиққа ташрифи ва унда белгиланган «Олмалиқ КМК» АЖни трансформация қилиш доирасида комбинат буйруғи билан бизнес жараёнлари ва технологик жараёнларини автоматлаштириш даражасини ошириш мақсадида 2022 йил учун 234 миллиард сўмлик 27 та лойиҳадан иборат чора-тадбирлар режаси тасдиқланди. Бундан ташқари, комбинат ресурсларини самарали бошқариш ва ишлаб чиқариш жараёнлари автоматлаштириш мақсадида ERP ва MES тизимини жорий этиш лойиҳалари устида иш олиб борилмоқда. Шу билан бирга, Ангрен кон бошқармаси «Қизил-олма» ва «Разведочная» кон шахталарида тоғ-кон диспетчери — диспетчерлик назоратининг автоматлаштирилган тизимини жорий қилиш, «Ёшлик-I» ва «Қалмоққир» конларида рақамли технологияларни қўллаган холда ишлаб чиқариш жараёнларини оптималлаштириш ва унумдорлигини ошириш каби бир қатор ишлар бажарилади», — деб маълумот берди А. Азизов.
ОКМКда рақамлаштириш лойиҳаларининг амалга оширилиши билан бир қатор натижалар кутилмоқда:
- комбинат бизнес жараёнларининг ягона ахборот платформаси (ERP тизими) ва тизимлар интеграцияси таъминланади;
- маркшейдер, кончи ва геологлар учун коннинг ягона рақамли маълумотлар базаси яратилади ва халқаро JORC кодекси асосида захираларнинг ҳисобга олиш аниқлиги оширилади;
- кон ишларини бажаришда тезкор бошқарув тизими ташкил этилади ва тоғ жинсини ташиш ҳажми 10 фоизга оширилиб, конларда эксплуатацион харажатлар 5—10 фоизга, ёнилғи сарфи 10 фоизга камайтирилади;
- ерости конларда техника хавфсизлиги оширилади;
- барча хужжатлар фақат электрон шаклда юритилади;
- ахборот-коммуникация инфратузилмаси такомиллаштирилади ва ахборот хавфсизлиги таъминланади.
Изоҳ (0)