Ўзбекистонда 2022/2023-ўқув йилидан қатор ОТМларга киришда чет тили фанидан касбий имтиҳон ўтказилади

Ўзбекистонда 2022/2023-ўқув йили қабулидан бошлаб қатор олий таълим муассасаларига киришда чет тили фанидан тинглаб тушуниш, ўқиш, ёзиш ва гапириш бўйича касбий (ижодий) имтиҳон ўтказилади. Бу ҳақда АОКАда ўтказилган матбуот анжуманида айтиб ўтилди.

Қайд этилишича, январь ва февраль ойларида 2 та муҳим қарор қабул қилинган. Булар:

• Вазирлар Маҳкамасининг «Хорижий тилларни ўрганишни такомиллаштириш бўйича қўшимча чора-тадбирлар тўғрисида»ги қарори;
• Вазирлар Маҳкамасининг «Чет тилини билиш даражасини аниқлаш бўйича давлат хизматлари кўрсатишнинг маъмурий регламентини тасдиқлаш тўғрисида»ги қарори.

Қарор билан 2022/2023-ўқув йили қабулидан бошлаб хорижий тиллар бўйича мутахассисларни тайёрлашга ихтисослашган Ўзбекистон давлат жаҳон тиллари университети, Самарқанд давлат чет тиллар институти, Тошкент давлат шарқшунослик университетининг фанлар мажмуасига чет тили биринчи фан сифатида киритилган бакалавриат таълим йўналишларига ҳамда Тошкент давлат педагогика университети, Қўқон давлат педагогика ва Нукус давлат педагогика институтларининг хорижий тиллар бўйича педагогларни тайёрловчи бакалавриат таълим йўналишларига кириш имтиҳонларида фанлар мажмуасидаги чет тили фанидан тинглаб тушуниш, ўқиш, ёзиш ҳамда гапириш компетенсияларини аниқлаш ва баҳолашга қаратилган касбий (ижодий) имтиҳон ўтказилади.

Бунда белгиланган миллий ёки халқаро тан олинган сертификатнинг тегишли даражаларига эга бўлган абитуриентларга ўқишга кириш синовларида берилган имтиёзлар сақлаб қолинади.