Кўпчилик аёллар бел соҳаси ва қорин бўшлиғидаги ҳажм ҳақида ташвишланади. Муаммони осонгина ҳал қилиш мумкин: стилистларнинг арсеналида бундай камчиликларни осонгина тўғрилайдиган оддий ва самарали усуллар мавжуд. Marie Claire нашри бу борада ёрдам беради.
Биринчи усул: диққатни чалғитиш
Яъни камчилик деб ҳисобланадиган қорин бўшлиғидан тананинг бошқа қисмига урғу бериш. Мисол учун, чиройли бўйнингиз бор – V шаклидаги ёқаларга эътибор қаратамиз ва унга маржон ёки занжир каби аксессуарлар билан урғу берамиз. Ёки нозик қўл ёки тўпиқларингиз бор. Тананинг ушбу соҳаларини ҳам таъкидлаш мумкин. Шундай қилиб, барча эътибор безовта қиладиган зонадан сизнинг фойдангизга ўтказилади.
Иккинчи усул: вертикал чизиқлар ёрдамида
Бу қоида нафақат чизиқли принтга, балки устки кийим ёрдамида яратилган вертикалларга ҳам тегишли. Бу узун кардиган, ўрта қаттиқ матодан тикилган жакет (ингичка ва юпқа эмас, шаклини ушлаб турадиган), куртка-кўйлак ёки тренч бўлиши ҳам мумкин.
Буларнинг барчаси силуэтингизни визуал равишда узайтирадиган ва керакли нюансларни ниқоблайдиган қўшимча вертикалларни яратади. Бунда устки кийим пастки қисмга нисбатан анча контрастли бўлиши керак. Ranглар билан ҳам бундай натижага эришса бўлади. Аммо эсда тутингки, ёрқин иссиқ ранглар қоматни визуал равишда кенг кўрсатади. Шунингдек, ялтироқ матоларга эҳтиёт бўлинг – улар катта ҳажм эффектини яратади.
Учинчи усул: кросс-боди сумка
Бу елкадан ўтказиладиган сумка. Уни юқоридаги тўпламлар билан тўлдириб, тана нисбатида диагоналликни яратиш мумкин. Ушбу аксессуарни белдан сал юқорироққа тақиш тавсия этилади. Шунда елка кенглигининг сон билан мувозанати сақланади ва бел торроқ кўринади.
Тўртинчи усул: кўйлак
Запахли кўйлакларни танлаймиз. Ушбу силуэтда яна диагоналлар ва елка/бел/сонларнинг тўғри нисбатларини яратишга ёрдам беради. V шаклидаги ёқа фигурангизни ингичка кўрсатади. Агар ярим очиқ кўйлакларни танласангиз, ортиқча аксессуарлардан сақланинг — тана ва кийим ўртасида бўш жой бўлиши керак. Бундай ҳолда белни ўрта кенгликдаги камар ёки белбоғ билан таъкидлаймиз. Ингичка камарлардан фойдаланманг — улар визуал равишда ҳажм қўшади.
Эркакларникига ўхшаш кўйлак ҳам қоринни яширишга ёрдам беради. Марказида тугмалари бўлган вертикал чок туфайли қомат узунроқ ва озғинроқ кўринади.
Бешинчи усул: тўғри танланган ранглар
Бел зонаси учун оддий, совуқ тўқ ранглардан фойдаланиш ҳам яхши самара беради. Муаммоли жойларни ранглар ёрдамида визуал равишда ажратамиз. Худди шундай эффект ялтирамайдиган матолар қўллаш орқали яратилади. Бунга қўшимча равишда монохром комбинациясида умумий образ яратиш мумкин.
Битта рангнинг турли нозик фарқлари билан ҳам образ янада қизиқарли кўринади. Бундай усул нафақат муаммоли жойларни визуал равишда яширади, балки силуэтни узунроқ ва бўйни баландроқ кўрсатади. Лекин иссиқ ёрқин ранглардан эҳтиёт бўлинг. Улар қоматнинг кенг кўринишига ва силуэтни аввалгидан кўра кўпроқ ҳажмли кўрсатишга мойил бўлади.
Олтинчи усул: тўғри танланган узунлик
Узунлик — керакли нисбатларни яратиш учун арсеналимиздаги яна бир ёрдамчи. Топлар, футболкалар ва ички қават бўлиб хизмат қиладиган нарсалар танага жуда ёпишиб турмаслиги керак. Қоматни ушлаб турадиган сифатли ва шаффоф бўлмаган мато танланг.
Бунда узунлик қорин остида тугаши, агар футболкаларни шимга қистирмай, тушириб юрмоқчи бўлсангиз, қорин бўшлиғини қоплаши керак.
Агар устингизга нарса ташламоқчи бўлсангиз, (кўйлак/кардиганлар) этак қисми соннинг энг тор қисмида тугаши лозим. Шундай қилиб, силуэт янада нозик ва бежирим кўринади. Агар узунликнинг охири соннинг энг кенг қисмигача бўлса ёки қорин бўшлиғида тугайдиган калта кўйлак кийсангиз, тескари натижага эришасиз.
Эсингизда бўлсин: кийимингизнинг узунлиги қаерда тугаса, айнан шу қисмга урғу берган бўласиз. Устки кийим кийишда топ ёки футболка тўлиғича шим ёки юбка ичига тиқилиши керак. Шунда бел чизиғи кўринади, шунингдек, устки кийим марказда иккита вертикал ҳосил қилади. Бу ортиқча ҳажмни қоплайди ва ўзингиздан кўнглингиз тўлишига ёрдам беради.
Кийим танлашда уларнинг узунлигини эҳтиёжларингизга мослаштиришдан қўрқманг. Айнан мана шу каби аҳамиятсиз кўринган нарсалар сизнинг идеал қиёфангизни яратади.
Изоҳ (0)