Қашқадарё вилоятининг Нишон тумани прокурори Хидир Каримов ишдан олинган. Бош прокуратура ахборот хизмати «Дарё»нинг бу ҳақдаги сўровига жавоб бериб, прокурор ишдан олинганини тасдиқлади.
«Бош прокурорнинг 2022 йил 2 февралдаги буйруғига кўра, Нишон тумани прокурори Хидир Каримов ишдан олинган. Унинг ўрнига ҳозирча ҳеч ким тайинланмаган», — дейди Бош прокуратура ахборот хизмати раҳбари Ҳаёт Шамсутдинов.
Нишон тумани прокурори сифатида ишлаб келган Хидир Каримов бунга қадар Навоий вилояти прокурори, Қорақалпоғистон прокурори вазифаларида фаолият юритган.
Хидир Каримов, шунингдек, «Дарё» ўқувчиларига келинидан набираларини тортиб олиб, суднинг қонуний талабини бажармаган прокурор сифатида ҳам яхши таниш.
Прокурор қайнотасининг ўзбошимчалиги ҳақида «Дарё»га мурожаат қилиб, икки нафар фарзандини кўриш мақсадида олиб кетган қайнотаси фарзандларини қайтариб бермаётганини, прокурор қайнота суднинг бу ҳақдаги қонуний қарорига қарши чиқаётганини айтган келин «Бош прокуратура қонунга итоат қилмаётган прокурорни тартибга чақирмайдими?», деганди.
«Дарё» мухбири собиқ прокурорнинг келини билан боғланиб, унинг қайнотасидан фарзандларини қайтариб олган ёки олмагани билан қизиқди.
«Аҳвол ҳамон ўша-ўша. Прокурорларга келганда Ўзбекистон қонунлари ишламайди, шекилли. Зўравон қайнотам ҳалигача болаларимни қайтариб бермади», — дейди Дилноза Раҳмонова.
Изоҳ (0)