Ферран Торрес «Наполи»га қарши учрашувдан сўнг йиғлаб юборди. «Барселона» ҳужумчиси бир нечта хавфли вазиятни кўкка совурганди (видео)

«Барселона» Европа Лигаси 1/8 финалига ўтиш босқичининг дастлабки ўйинида «Наполи» билан 1:1 ҳисобида дуранг ўйнади.

Каталонияликлар футболчиси Ферран Торрес ҳакам ҳуштаги янграганидан кейин ҳиссиётларини жиловлай олмади ва йиғлаб юборди. Торрес пенальтидан унумли фойдаланган бўлса-да, тўртта голли вазиятни йўққа чиқарганди.

Жамоадошлари ва ҳатто «Наполи»нинг бир нечта футболчиси Ферранга далда берди. Торрес боши эгик ҳолда майдонни тарк этди.

Каталонияликлар бош мураббийи Хави футболчини қўллаб-қувватлади:

«Луис Суарес билан ҳам шундай воқеа содир бўлганди. ‘Барселона’ футболкаси бир неча килограмм оғирроқ. Аммо Торрес жамоамизда эканлигидан хурсандман. У ҳар доим гол уриб келган ва бу давом этади.

Машғулотларда Ферран голлар бўйича етакчилардан бири. Биз унга тўлиқ ишонамиз. Мураббийлар штаби ва мен бу ҳақида қайғурамиз. У жуда кучли ва шу ўринда масъулиятли ҳамдир».

Футболчи январь ойида 45 миллион евро эвазига «Манчестер Сити»дан «Барселона»га ўтганди. «Кўк-анорранглилар» сафида барча мусобақаларда 6 та ўйинда майдонга тушиб, битта гол муаллифига айланди.