Ўзбекистон президенти Шавкат Мирзиёев 10 февраль куни Самарқанд вилоятида бўлиб қайтди. Ташриф давомида давлат раҳбари бир қатор объектларни бориб кўрди, маҳаллалардаги ҳоким ёрдамчилари билан суҳбатда бўлди, вилоят масъуллари билан йиғилишда 10 нафар раҳбарни ишдан олди. Ташрифни Самарқанддан ёритиб борган «Дарё» мухбирлари ўз таассуротлари ва репортажини ҳавола қилади.
Ташрифнинг дастлабки манзили — йилига 2,5 миллион, соатига 800 нафар йўловчига хизмат қиладиган Самарқанд халқаро аэропорти
Вилоятга етиб келган давлат раҳбари дастлаб Самарқанд халқаро аэропортида яратилаётган шароитларни кўздан кечирди. Ушбу аэропорт қарийб 83 миллион долларлик лойиҳа эвазига янгидан қурилмоқда. 2021 йили учиш-қўниш йўлаги қайта қурилган. Бугунги кунда янги терминал тўлиқ тикланиб, пардозлаш ишлари олиб борилмоқда. Йўл, автотураргоҳ ва ёритиш устунлари барпо этилмоқда.
Эътиборли жиҳати шундаки, терминалда self checking, яъни ўзини-ўзи рўйхатдан ўтказиш тизими мавжуд. Мазкур тизим орқали фуқаро ўз паспорти орқали махсус ускунадан чиптани олиб, божхона назоратига ўтади. Бу ерда ҳам автоматлаштирилган тизим орқали ақлли технологиялар фуқарони текширади.
Айни вақтда сўнгги пардозлаш ишлари олиб бориляпти, янги учиш-қўниш йўлаги барпо этилди, замонавий радиолокацион тизим, 24 та самолёт учун тураргоҳ ҳамда 700 та автомобиль учун автотураргоҳ қурилди.
Мазкур аэропорт биноси Мирзо Улуғбекнинг «Зижи жадиди Кўрагоний» китоби шаклида барпо этилган. Терминалнинг эни 175, баландлиги 25 метр. Терминал бир йилда 2,5 миллион, бир соатда 800 нафар йўловчига хизмат кўрсатиш қувватига эга бўлади.
Аэропортда «очиқ осмон» режими қўлланилади, карго хизмати ҳам йўлга қўйилади. Янги терминал жорий йилнинг март ойида фойдаланишга топширилади.
Навбатдаги манзил — қайтадан қурилаётган Имом Бухорий мажмуаси
Шавкат Мирзиёев Самарқандга ташрифи чоғида буюк муҳаддис Имом Бухорий қабрини зиёрат қилди. Давлат раҳбари мажмуа қурилишини кўздан кечирди.
Бу ерда қарийб 10 минг намозхонга мўлжалланган масжид, тўртта минора, айвонлар барпо этилмоқда. Мақбаранинг ўнг томонида, ер остида галерея қурилмоқда. Бу ерда зиёратчилар аллома қабрини кўриш имкониятига эга бўлади. Мақбара наққошлик ва хаттотлик санъати асосида сайқалланади. Унинг деворларига қадимий услубда Қуръони карим суралари ва ҳадислар ёзилади.
Шунингдек, Шавкат Мирзиёев ҳазрати Ҳизр мажмуасидаги Ўзбекистоннинг биринчи президенти Ислом Каримов мақбарасини ҳам зиёрат қилди.
Бўстонсарой кўчасида қурилган галерея услубидаги кўприкни пиёда кўздан кечирган президент
Навбатдаги манзил вилоятдаги Бўстонсарой ва Рудакий кўчалари кесишмасида қурилган туннел бўлди. Туннелнинг узунлиги 120, кенглиги қарийб 27 метр. Рудакий кўчасида автомобиль ва трамвай йўли, пиёдалар ва велосипед йўлаклари қурилган.
Шу ерда президент йўллардаги авариялар, жамоат транспорти тизими ҳақида ҳам гапириб, Самарқандда трамвай бор эканлигини алоҳида қайд этди. Шавкат Мирзиёев Тошкентга ҳам трамвайни қайтариш ҳақида таъкидлади. Президентнинг сўзларига кўра, бу бўйича фуқаролардан кўплаб мурожаатлар келиб тушган.
Туннел қурилиши кўздан кечирилгандан кейин йўлга тушган президент кортежи сал ўтмай яна тўхтади. Шавкат Мирзиёев мазкур туннел яқинида, Бўстонсарой кўчасида қурилган галерея услубидаги кўприкни пиёда кўздан кечирди.
Шу пайтгача йўлнинг Сиёб канали устидан ўтган қисми анча паст бўлиб, ёғингарчилик пайтида транспорт ва пиёдалар учун ноқулайлик туғдириб келган. Шу боис йўл 23 метргача кўтарилиб, эни 31 метргача кенгайтирилган. Йўлнинг икки четида ҳимоя воситаси, шовқин камайтирувчи тўсиқлар ўрнатилган. Пиёдалар ва велосипед йўлаклари барпо этилган.
Президент Самарқанддаги кўзи ожизлар мактаб-интернатининг тўрт ўқувчисини ОТМларга имтиҳонсиз қабул қилди
Шавкат Мирзиёев Самарқанд шаҳридаги 59-сон кўзи ожизлар мактаб-интернатига ташриф буюрди.
Ташриф давомида президент кўзи ожиз ўқувчилар учун олийгоҳни тугатганларидан кейин ҳар бир давлат идорасида иш ўрни бўлиши кераклигини айтди.
Давлат раҳбари ушбу мактабда ўқитувчи ва ўқувчилар билан суҳбатда бўлиб, у ерда ўқийдиган икки нафар қизга олий ўқув юртларига имтиҳонсиз ўқишга кириши бўйича қарорга имзо чекишини айтди.
«Мен сизларнинг мактабларингиз ҳақида кўп эшитдим, Одинахон ва Маҳбубахонлар шахмат-шашка бўйича Ўзбекистон ва Жаҳон чемпионлари экан. Бу сизларнинг матоналатларингиз. Иккингиз ҳам хоҳлаган олийгоҳларингизга имтиҳонсиз қабул қилинасиз. Сизлар бугундан бошлаб ўзларингизни студентман деб ҳисоблашингиз мумкин», — деди президент.
Бундан ташқари, президент шашка бўйича олти карра Ўзбекистон чемпиони бўлиб, 2022 йилда Францияда бўлиб ўтадиган Жаҳон чемпионатига чиққан қизга ҳам олий ўқув юртига имтиҳонсиз қабул қилинишини айтди.
Шунингдек, Шавкат Мирзиёев мактабнинг ўқитувчиларидан бири билан суҳбатда бўлган ва унинг қизига пианино совға қилишини айтди. Бундан ташқари, президент у қизга ҳам олий ўқув юртига ўқишга кириши бўйича қарорга имзо чекишини таъкидлади.
Кейинги манзил — қиймати 381 миллион долларни ташкил этадиган Silk road Samarkand туризм маркази қурилиши бўлди
Шавкат Мирзиёев ташриф давомида қиймати Silk road Samarkand туризм маркази қурилишини бориб кўрди.
Ушбу мажмуа Самарқанд туманидаги эшкак эшиш канали бўйида барпо этилмоқда. Бугунги кунда 8 та меҳмонхона, конгресс ҳолл, «Абадий шаҳар» карвонсаройи қурилмоқда. Меҳмонхоналарнинг иккитаси 22 қаватли, беш юлдузли, қолганлари тўрт юлдузли бўлади.
Давлат раҳбари бизда туристлар келиб томоша қиладиган бино ва обидалар кўплиги, лекин хизматлар тури кам, сифати паст эканлигини таъкидлади. Шавкат Мирзиёев Туризм ва спорт вазири Азиз Абдуҳакимовга туризм соҳасида ўқиётган талабалар шу ерга келиб, амалиёт ўташи зарурлигини айтди.
Шунингдек, президент «Абадий шаҳар» карвонсаройини ҳам кириб кўрди.
«Бу ерда тарихимиз, маданиятимиз намоён бўлади, одамлар болалари билан келиб кўради. Шунинг учун бинолардаги безаклар, ранглар меъёрида, миллийлигимизга хос бўлиши керак. Карвонсарой ҳовлисида ҳунармандлар растаси ташкил қилиш ҳам мумкин», — деди президент.
«Битта маҳаллани тинчитган одам — у жамиятнинг қуйи поғонасидаги вазиятни билган одам». Президент Жомбой туманидаги 38 та маҳаллага тайинланган ҳоким ёрдамчилари ва ёшлар етакчилари билан суҳбатда бўлди
Ташрифнинг навбатдаги манзили эса Жомбой тумани «Тошкент» маҳалла фуқаролар йиғинига борди. Мазкур ҳудудда давлат раҳбари 38 та маҳаллага тайинланган ҳоким ёрдамчилари ва ёшлар етакчилари билан суҳбатда бўлди.
«Биз маррани жуда катта олдик. Самарқандда қиладиган ишларимиз шу кунгача қилган ишларимиздан беш карра кўп десак тўғри бўлади. Маҳаллаларда йўллар, свет, газ йўқ, ишсизлик мавжуд, одамлар мактабларидан норози. Ҳали мактабгача таълимимиз ҳамма қишлоқда йўқ. Халққа яқин бўлган давлат барча жабҳада ютади. Ота-бобомиздан қолган маҳаллани биз қанотсиз, қўлсиз, билимсиз, пулсиз қилиб қўйгандик. Мен ҳоким ёрдамчиларига катта имкон яратаман. Чунки битта маҳаллани тинчитган одам — у жамиятнинг қуйи поғонасидаги вазиятни билган одам», — дейди президент.
Шавкат Мирзиёев ҳоким ёрдамчиларидан бири билан суҳбатда бўлиб, ундан маҳалласида қанча ишсиз фуқаро борлигини ва бунинг учун қандай ечим борлигини сўради. Таъкидланишича, бир маҳаллада 112 нафар ишсиз мавжуд ва улар томорқаси бор бўлган хонадонларга 10 нафардан бириктириляпти.
Танқидий руҳда ўтган йиғилишда 10 нафар раҳбар ишдан олинди — президент ташриф якунида Самарқанд вилояти ҳокимлар ва сектор раҳбарлари иштирокида учрашув ўтказди
Танқидий руҳда ўтган йиғилишда шаҳар ва туманлардаги долзарб иқтисодий-ижтимоий масалалар кўрсатиб ўтилди. Айрим ҳокимлар порахўрлик, таниш-билишчиликка йўл қўйган, одамлар дардига беэътибор бўлганлиги айтилди. Зарур маблағлар ажратилган бўлса-да, ичимлик суви, иссиқлик ва электр таъминотини яхшилаш ишлари суст ташкил этилгани таъкидланди.
Сув тежовчи технологиялар жорий қилиш учун ажратилган субсидия маблағлари мақсадсиз ишлатилган. Вилоят банкларида муаммоли кредитлар ҳажми ортган, кредитларни нотўғри ажратиш, имтиёзли кредитларга мўлжалланган маблағларни талон-торож қилиш ҳолатлари аниқланган. Йўл-транспорт ҳодисалари, жиноятлар сони ошган.
Шавкат Мирзиёев йиғилиш давомида 10 нафар раҳбарни ишдан олди. Давлат раҳбари бундан ҳамма хулоса қилиш кераклигини айтди.
«Биз ислоҳотлар қиляпмиз. Инсонлар ҳаётини яхшилаш учун қарорлар чиқариляпти. Биз халқимиз олдида, халқаро ҳамжамият олдида очиқлик, эркинликни таъминлаш учун ҳаракат қиляпмиз. Инсонларни рози қилиш ҳақида гапириб турганимда раҳбарларнинг ўзини ўйлаб, нопок ишлар қилишига йўл қўймайман», — деди президент.
Шундай қилиб 10 февраль куни кечқурун давлат раҳбарининг Самарқанд вилоятига қилган ташрифи якунланди.
Изоҳ (0)