Ижтимоий тармоқларда «Чор Бакр» мажмуидаги ер аукцион савдога қўйилгани тўғрисида хабарлар тарқалди. Туризм ва спорт вазирлиги ҳузуридаги Маданий мерос агентлиги эълон қилинган маълумотларга муносабат билдириб, маданий мерос объектининг муҳофаза теграларида ер участкалари ижарага ва мулк ҳуқуқи асосида ноқонуний электрон онлайн-аукционга қўйилганини маълум қилди.
Маданий мерос инспекцияси ҳамда Маданий мерос агентлигининг маълум қилишича, 2022 йил 17 январдаги Бухоро вилоятида хизмат текшируви ўтказилиши натижасида Бухоро тумани «Шергирон» МФЙ ҳудудида жойлашган давлат муҳофазасига олинган «Чор Бакр» (мажмуаси) маданий мерос объектининг муҳофаза теграларида ер участкалари ижарага ва мулк ҳуқуқи асосида ноқонуний электрон онлайн-аукционга қўйилгани аниқланган.
Бухоро вилояти Маданий мерос бошқармаси томонидан 7 январь куни (03-м/21-сонли) Кадастр агентлигининг Давлат кадастрлар палатаси Бухоро вилояти бошқармасига йўлланган мурожаат хатига кўра «Чор Бакр» мажмуаси қўриқланадиган теграсидан 0,018 гектардан жами 6 та (0,108 гектар) бўш турган ер участкасини «Ерэлектрон» автоматлаштирилган ахборот тизимидан чиқариб ташлаш чораларини кўришни билдирган.
Шунингдек, Бухоро вилояти маданий мерос бошқармаси 10 январь куни Бухоро тумани ҳокимига, «Ерэлектрон» автоматлаштирилган ахборот тизимига қўйилган 6 та ер участкаларини аукциондан чиқаришда ҳамда «Чор Бакр» мажмуасининг муҳофаза теграларида тарихий-маданий муҳити, табиий ландшафти ва ўзига хослигини сақлаб қолиш мақсадида унинг муҳофаза теграларида барча турдаги янгидан амалга ошириладиган қурилиш-таъмирлаш ишларини белгиланган тартибда Маданий мерос агентлиги билан келишилган ҳолда олиб борилиши юзасидан мурожаат йўллаган.
Мазкур ҳолат юзасидан материаллар ҳуқуқий баҳо бериш учун ҳуқуқни муҳофаза қилувчи органларга юборилган.
«Чор Бакр» мажмуаси ва унинг муҳофаза ҳудудида ҳамда маданий мерос объектлари ва уларнинг теграларида тегишли рухсатномаларни олмасдан ер қазиш, ер тузиш, бино ва иншоотларни қуриш ёки уларни бузиш ишларини амалга оширилган тақдирда амалдаги қонун талабларига биноан жавобгарликка тортилиши ҳақида огоҳлантирилган.
Ушбу мажмуа ЮНЕСКО Умумжаҳон мероси объектлари рўйхатига киритиш мутахассислар иштирокида, илғор ва юқори технологик ускуналардан фойдаланган ҳолда номзодлик ҳужжатлари тайёрланиб, белгиланган тартибда ЮНЕСКО Умумжаҳон мероси марказига тақдим этилган.
Ҳолат юзасидан Маданий мерос инспекцияси ҳамда Маданий мерос агентлиги томонидан XVI-ХХ асрларга мансуб бўлган ушбу тарихий ёдгорликнинг муҳофаза қилинадиган тегралар ҳудудидан ижарага ва мулк ҳуқуқи асосида 6 та ҳар бири 0,018 гектардан иборат ер участкалари берилиши амалдаги қонун ҳужжатлари талабларига зид равишда электрон онлайн-аукцион орқали сотувга қўйилганлигини инобатга олиниб, ҳолатга ҳуқуқий баҳо бериш мақсадида ҳужжатлар ҳуқуқ-тартибот органи идораларига юборилган.
Аввалроқ Тошкент маҳаллалари ЮНЕСКО Бутунжаҳон маданий меросининг дастлабки рўйхатига киритилгани, Бухородаги 7 та тарихий обида ICESCO’нинг Ислом олами мероси рўйхатига киритилгани тўғрисида хабар берилганди.
Изоҳ (0)