Бухорода кар ва заиф эшитувчилар мактаби директори Ҳамза Собиров порахўрликда айбланиб, ишдан бўшатилгани, орадан вақт ўтиб эса суд қарори билан яна ишга қайтгани тўғрисида хабар берилганди. Бухоро вилоят халқ таълими бошқармасининг «Дарё»га маълум қилишича, ушбу мактаб директори 1 февраль куни ишдан бўшатилган.
2017 йилдан бери Бухоро шаҳридаги 123-сонли кар ва заиф эшитувчи болалар махсус мактаб-интернатини бошқариб келган Ҳамза Собиров Бош прокуратура ҳузуридаги иқтисодий жиноятларга қарши курашиш департаменти вилоят бошқармаси тақдимномаси билан педагог ўқитувчилар ва тарбиячиларга дарс соатларини бир ойлик иш ҳақи эвазига сотганликда айбланиб, 2021 йилнинг 13 октябрь куни лавозимидан олинган. Мазкур ишни кўриб чиққан фуқаролик ишлари бўйича Бухоро туманлараро суди эса бошқарма бошлиғининг директорни ишдан олиш тўғрисидаги буйруғини ғайриқонуний деб топгач, директор 2022 йил 5 январь куни лавозимига қайтган.
Бухоро вилоят халқ таълими бошқармасининг маълум қилишича, Бухоро шаҳридаги кар ва заиф эшитувчи болалар учун ихтисослашган 123-мактаб-интернати директори Ҳамза Собиров 2022 йилнинг 1 февраль куни ўз розилиги билан ишдан бўшаш тўғрисида ариза ёзган ва лавозимидан олинган. Ҳамза Собиров вилоят халқ таълими бошқармаси бошлиғи буйруғи билан Бухоро шаҳар халқ таълими бўлими кадрлар бўйича инспектор-методисти лавозимига ўтказилган.
Изоҳ (0)