Амир Хон Болливуднинг ўзига хос истеъдодга эга актёрларидан биридир. Ўз қонун-қоидалари асосида ҳаёт кечираётган, экранда турли образларни бемалол гавдалантирадиган актёр томошабинлар қалбидан алоҳида ўрин эгаллаган. Амир Хон Ҳиндистон кино саноатида ўттиз йилдан ортиқ муваффақият қозонди ва бу, албатта, таҳсинга лойиқ ютуқ. Бугун унинг бир-бирига ўхшамайдиган роллари билан иштирок этган фильмлар кетма-кетлигини эътиборингизга ҳавола этамиз.
«Гажини» фильми (2008)
Ушбу фильмда Амир Хон кўнгли синган ошиқ ролида томошабинларнинг эътиборини ўзига бутунлай жалб этади. У безорилар билан аёвсиз жанг қилади. Фильмда актёрнинг ташқи кўриниши бутунлай бошқача, уни спорт билан шуғулланиши натижасида жисмонан жуда кучли қаҳрамон сифатида кўриш мумкин.
«Уч савдойи» комедияси (2009)
2008 йилги «Гажини» фильмидаги шафқатсиз образни ўйнагач, актёр «Уч савдойи» фильмида китоблар ва дўстлар оламига кириб келди. Енгил комедия муваффақиятга эришди ва Хон унда коллеж талабаси ролини ўйнади. Актёр жисмоний қиёфасини ўзгартирди: энди у жуда ҳам ўқишни яхши кўрадиган озғин талабага айланади.
«Дангал» фильми (2016)
Амир Хон ушбу фильмда ёши улуғ курашчи – кучли, лекин айни пайтда кекса одам ролини ўйнаган. У рол учун бироз қўшимча вазнга эга бўлди ва ўзининг янги қиёфаси билан томошабинларни ҳайратда қолдирди.
«Ҳиндистон талончилари» фильми (2018)
Амир Хоннинг «Ҳиндистон талончилари» фильмидаги кўриниши энг кўп муҳокамаларга сабаб бўлган. Айниқса, унинг бурун тақинчоғи, зираклари, жингалак сочлари ва мўйлови. Актёр образ учун ўзини бутунлай ўзгартирди, натижада томошабинлар ҳатто уни танимай қолди.
«Лаал Сингх Чадҳа» фильми (2020)
Амир навбатдаги рол учун соч ва соқолини ўстирди. У ўз қиёфасини яна бутунлай ўзгартирди. Ролни ҳис қилиш ва томошабинларни яна бир бор ҳайрон қолдириш учун ушбу персонаж ҳаётига кириб кетди. Фильм Американинг «Форрест Гамп» фильми асосида суратга олинган.
Изоҳ (0)