Боёвут тумани ҳокими Дилфуза Уралова Халқ депутатлари туман кенгашининг 34-сессиясида ўзининг кенгаш раиси мақомини депутатларга топширди. Бу ҳақда туман ҳокимининг матбуот котиби хабар берди.
«Яна бир янгиликни айтмоқчиман. Бундан буён кенгаш раҳбари ҳоким бўлмайди. Тажриба тариқасида Боёвут туманида маҳаллий кенгаш раиси депутатлар орасида сайланади. Бир умрлик орзум шу, энди биринчи сектор раҳбари сифатида кенгаш мажлисида секторлар қаторида пастда ўтириб, нейтрал ҳисобот топшираман, яъни ўзим кенгаш раиси вазифасини амалга оширмайман», – дейди у.
«Gazeta.uz»нинг Ураловага таяниб ёзишича, туманга давлат раҳбарининг ташрифи белгиланмоқда. «Эртага сизлар билан учрашади, ҳокимни алоҳида, кенгашни алоҳида қилиб бераман дейди, сизларни фаолликларингни назорат қилади энди. Эртага сенаторлар, доимий ишлайдиган депутатларга шароит қилиб берамиз, ойлик оласиз. Депутатлар Боёвутда фаол бўлгани учун ҳам айнан шу ердан бошлашаяпти», — дейди ҳоким.
Дилфуза Уралованинг таъкидлашича, ҳозирда депутатларнинг ойлик маошини ҳал қилиш юзасидан тегишли ҳужжатлар ишлаб чиқилмоқда.
«Тўғри, бариқамиз, чақирамиз, (ўзаро муҳокамаларда тортишув назарда тутилмоқда — таҳр.) лекин, бу ривожланишимиз учун. Қуронбоев [Президентининг давлат хизмати ва ҳокимият вакиллик органлари билан ҳамкорлик қилиш масалалари бўйича маслаҳатчисининг биринчи ўринбосари Қаҳрамон Қуронбоев] бошчилигидаги гуруҳ келиб кетди», — дейди ҳоким.
Ўзбекистонда ҳокимларнинг халқ депутатлари кенгаши раиси сифатидаги мақомини бекор қилиш бўйича қонун лойиҳаси тайёрланаётгани тўғрисида 2019 йилда хабар берилганди. Нашрнинг Қонунчилик палатасига таяниб ёзишича, «ҳужжат қуйи палатага келиб тушмаган, шу сабабли муҳокама қилинмаган». Сенат ҳам қуйи палатада кўриб чиқилмаган ҳужжат юқори палатага ҳам келиб тушмаслигини қайд этганди.
Эслатиб ўтамиз, Шавкат Мирзиёев ҳокимларни лавозимга сайлашни биринчи бор 2016 йилнинг декабрида таклиф этган эди. 2017 йилнинг августида у ҳозироқ ҳокимларни халқ сайлаши тизимини жорий этишга тайёрлигини билдирганди.
2020 йилнинг сентябрь ойида давлат раҳбари яна бир бор «Ҳокимларни халқ сайлаши керак. Шу кунларга барибир келамиз», деб таъкидлаганди. Бундан ташқари, 2021 йил 18 июнь куни ҳам «Барибир ҳокимларни халқ сайлайди, қандай оғир бўлмасин, шу кунга келамиз» деганди.
Ҳозирда вилоятлар ва Тошкент шаҳар ҳокимлари тегишли халқ депутатлари кенгаши томонидан тасдиқлангандан кейин Президент томонидан лавозимга тайинланади ва лавозимдан озод қилинади. Шу билан бирга, номзодни давлат раҳбари тавсия этади.
Депутат Расул Кушербаев халқ ҳокимларни сайлашга тайёр эмаслиги ҳақидаги фикрга қўшилмаслигини маълум қилган эди. Унинг сўзларига кўра, «рухсат бераётганларнинг ўзи тайёр эмас». «Уларда қўрқув бўлиши мумкин. Қайси маънода, улар хоҳлаган одамни одамлар сайламаслиги мумкин», — деган у.
Изоҳ (0)