Португалияда 30 январь, якшанба куни муддатидан аввалги парламент сайловлари учун овоз бериш бўлиб ўтди. Дастлабки маълумотларга кўра, бош вазир Антонио Коштанинг социалистик партияси сайлов етакчисига айланди, деб ёзмоқда «ТАСС».
Коронавирус пандемияси шароитида ўтказилган сайловда сайловчиларнинг фаоллиги 45,66 фоизни ташкил этди, бу 2019 йилдаги овоз беришдан етти фоизга кўп.
Сайлов бюллетенларининг 95,22 фоизи санаб чиқилгач, Португалия бош вазирининг Социалистик партияси 41,49 фоиз, унинг асосий рақиби бўлган Социал-демократик партияси эса 29,08 фоиз овоз олгани маълум бўлди. 7,08 фоиз овоз билан ўнг қанот партияси учинчи сиёсий кучга айланди, унинг аъзолари парламентдан ўрин олади.
Португалия республика кенгаши (бир палатали парламент) 230 нафар депутатни ўз ичига олади.
Мамлакатда сайловлар дастлаб 2023 йилга белгиланган эди, бироқ 2021 йилнинг сентябрида Португалия парламенти мамлакатнинг 2022 йилги бюджети лойиҳасини қўллаб-қувватламагач, президент Марселу Ребелу де Соуз парламентни тарқатиб юбориш ва муддатидан олдин сайловлар ўтказиш режасини маълум қилди.
2021 йилнинг январида Португалияда президент сайловлари бўлиб ўтганди, унда Марселу Ребелу де Соуза яна ғолиб бўлган.
Изоҳ (0)