Ижтимоий тармоқларда хориждан ўқишни кўчириш бўйича олий ва ўрта махсус таълим вазири Абдуқодир Тошқулов иштирокида видеоселектор йиғилиш ўтказилгани ҳақида хабарлар тарқалди. Олий ва ўрта махсус таълим вазирлиги матбуотининг маълум қилишича, ушбу хабарлар ҳеч қандай асосга эга эмас ва ёлғон.
Таъкидланишича, вазир иштирокида ўқишни кўчириш мавзусига оид ҳеч қандай видеоселектор йиғилиши бўлмаган. Хориждан ўқишни кўчириш амалдаги норматив-ҳуқуқий ҳужжатлардаги тартибга кўра амалга оширилмоқда.
«Ҳурматли ижтимоий тармоқ фаоллари! Ҳар хил сохта ахборотларга ишониб қолмаслигингизни яна бир бор сўраб қоламиз ва ОТМга ўқишни кўчиришга доир ҳар қандай хабарнинг ҳақиқийлигини аввал вазирликнинг Telegram’даги @eduuz расмий канали орқали текшириб кўришингизни тавсия этамиз», — дейилади муносабатда.
Шу билан бирга, вазирлик асоссиз ва ёлғон ахборотни тарқатганлик учун қонунчиликка жавобгарлик белгиланганини яна бир бор эслатиб ўтган.
Аввалроқ ижтимоий тармоқларда Олий ва ўрта махсус таълим вазирлиги номидан хориждан ўқишини кўчирмоқчи бўлган талабалар ҳеч қандай имтиҳонларсиз ўқишини Ўзбекистонга кўчиришга рухсат берилиши ва кўчириш учун барча ҳужжатлар 15 февралгача қабул қилиниши тўғрисида хабарлар тарқалганди. Кейинроқ вазирлик бунинг ёлғон эканини тўғрисида муносабат билдирган эди.
Изоҳ (0)