«ПСЖ» ҳужумчиси Лионель Месси ва унинг собиқ жамоадоши, «Барселона» ҳимоячиси Херард Пике ўртасидаги муносабатлар ёмонлашган. Бу ҳақда журналист Луис Канут хабар берди.
Манбага кўра, Месси Пикенинг Хорди Альба ва Серхио Бускетсдан фарқли ўлароқ, унга «Барселона»да қолиш имкониятини бериш учун маошининг камайишига рози бўлмаганидан ранжиган.
«Пикенинг яқинда узайтирган шартномаси Мессининг ҳафсаласини пир қилди. Чунки Лео ‘Барселона’дан кетгунга қадар Пике янги шартнома имзоламаган. Аргентиналик унинг жамоада қолиши учун Херард аввалроқ каталонияликлар билан шартномани узайтириши лозим эди, деб ҳисоблайди», — деган журналист Луис Канут.
Аввалроқ, 34 ёшли Пикенинг каталонияликлар сафидаги энг кўп маош олувчи футболчи эканлиги хабар берилганди. У солиқлар билан биргаликда йилига 28 миллион евро маош олиши маълум қилинганди. Шундан сўнг ҳимоячи Twitter саҳифасида 2,3 миллион евро кўрсатилган банк чекини кўрсатди ва бу 2021 йилда олган маошининг 50 фоизи эканлигини ёзиб қолдирди.
Эслатиб ўтамиз, Лионель Месси 2021 йилнинг ёзида эркин агент сифатида «ПСЖ»га ўтди ва 2023 йилнинг ёзигача мўлжалланган шартномага имзо чекди. Аргентиналик ҳужумчи Лига 1 да 12 та ўйинда иштирок этиб, битта голга муаллифлик қилди.
Изоҳ (0)