Қозоғистонда вақтинча рўйхатга туриш муддати тугаган ва ишлаш учун рухсатномаси бўлмаган ўзбекистонликларнинг муаммоси ҳал этилди, деб хабар беради Ташқи меҳнат миграцияси агентлиги.
Маълум қилинишича, 19 январь куни Нур-Султон шаҳри Есил тумани миграция полицияси идорасида ҳужжатсиз ушланган Ўзбекистон фуқаролари тўғрисида маълумот келиб тушган.
Ушбу маълумотга кўра, Есил тумани миграция полицияси идорасига бориб, 18 нафар Ўзбекистон фуқаролари билан учрашилган. Фуқароларнинг паспорти борлиги, аммо вақтинчалик рўйхатга туриш муддати тугагани ва ишлаш учун рухсатномаси йўқлиги маълум бўлган.
Фуқароларга Қозоғистон қонунларини бузмаслик, ўрнатилган тартибда ҳужжатларни расмийлаштириш борасида ҳуқуқий тушунча берилган.
Шунингдек, фуқаролар Қозоғистонга танишлари орқали келиб, қурилишда ишлаётганини маълум қилган. Уларга Ташқи меҳнат миграцияси агентлиги томонидан амалга оширилаётган пилот лойиҳа мазмун-моҳияти тушунтирилган.
Учрашувда Есил тумани миграция полицияси томонидан биринчи марта Қозоғистонга келган фуқароларга огоҳлантириш, икки ёки кўп марта келганларга жарима ёзилган.
Аввалроқ Ўзбекистон фуқароларининг Жанубий Кореяга киришига вақтинчалик чеклов қўйилиши мумкинлиги, Ўзбекистон ва Кувайт ўртасида меҳнат миграциясини ташкил этиш бўйича ҳукуматлараро битим имзоланиши, Германияда ўзбекистонлик ҳамшираларга 2,5 минг доллардан ортиқ маошли иш таклиф қилинаётгани, Россиядаги ўзбекистонлик мигрантларга ёрдам пули берилиши рад этилгани тўғрисида хабар берилганди.
Изоҳ (0)