Ҳукуматнинг 2019 йил 16 ноябрдаги қарори билан тасдиқланган ер участкалари олиб қўйилиши ва олиб қўйилаётган ер участкасида жойлашган кўчмас мулк объектлари мулкдорларига компенсация бериш тартиби тўғрисидаги низомга ўзгартириш ва қўшимчалар киритилди. Бу ҳақда Қонунчилик палатаси депутати Расул Кушербаев маълум қилди.
«Мазкур қарор билан тасдиқланган низом асосида ҳокимият ва ‘учар тадбиркор’лар аҳоли розими, йўқми, инобатга олмаган ҳолда, ‘ҳудуднинг архитектура қиёфасини яхшилаш’ ниқоби билан фуқароларнинг уй-жойларини буздириб, ўзларига фойда берадиган объектларни қуриб, сотиш билан шуғулланиб келишаётган эди.
Низомга кўра, қайсидир ҳудудда фуқароларнинг кўчмас мулкларини бузиш ҳисобига инвестиция лойиҳасини амалга ошириш керак бўлса, дастлаб ўша жойнинг мулкдорлари билан очиқ муҳокама ўтказилиши керак» — деб ёзади депутат.
Кушербаевнинг таъкидлашича, энди низомга ўзгартириш киритилиб, ўша очиқ муҳокама давомида инвестиция лойиҳасини амалга ошириш режалаштирилган ер участкасида инвестиция лойиҳаси амалга оширилишига битта мулкдор қарши бўлган тақдирда ҳам, мазкур ҳудудда ушбу инвестиция лойиҳасини амалга оширишга йўл қўйилмаслиги белгилаб қўйилди.
"Бу, менимча, фуқароларнинг мулк дахлсизлигини таъминлаш йўлидаги яхши амалий қадам. Биз бизнес юритиш, инвестиция оқимини кучайтириш, энг муҳими, фуқаро ва давлат ўртасидаги ишончнинг мустаҳкамлигида бу талаб қанчалар зарур эканлигини кўрдик.
Энди бу камчиликларни кеч бўлса ҳам, тўғрилаб, судсиз ёки компенсациясиз мулкларидан маҳрум бўлиб, йиллаб сарсон юрган фуқаролар олдидаги қарзимизни қоплашимиз керак», — деб ёзади Расул Кушербаев.
Мавзуга доир:
- Ўзбекистон мулкни адолатли мусодара қилиш бўйича дунё рейтингида 139 та давлат ичида 138-ўринни эгаллади
- Ўзбекистонда 2022 йилда «снос»лар етказган зарарни қоплаш учун бюджетдан 500 млрд сўм ажратилади
- Самарқандда «снос»га тушган ҳудуддан топилган Қуръон оятлари туширилган қадимий қабртошлар қайси асрга ва кимга тегишли экани аниқланди
Изоҳ (0)