«Equinox ҳайдаганимда дўст бўлганлар Cobalt’га ўтганимда йўқолиб қолди». Баҳора Арслонова сохта дўстлар ҳақида (видео)

«Дарё» мухбири Наргиза Муродова актриса Баҳора Арслонова билан интервью ташкил қилди. Актриса суҳбат давомида санъатдаги сохта дугоналари, Equinox машинаси сабаб уларни саралаб олгани ва «деди-деди» лардан чарчагани ҳақида гапирди.

Санъатда бирорта дугонам йўқ. Опам Лола Элтоева ва синглим Интизор Тожибоевадан бошқа бирорта яқин инсоним йўқ. Балки сабабини айтсам, куларсиз. Аммо ҳаётимда ҳақиқатан ҳам шундай бўлди. Катта акам Equinox машинасини олганда бир-икки марта ҳайдаб юрдим. Ишонасизми, шу даражада мен билан яқин бўлишни истовчи инсонлар кўпайиб кетдики, ишим қолиб, дугоналарим билан вақт ўтказадиган бўлиб қолдим. Шундан кейин машинани акамга топшириб, Cobalt олдим. Шундан кейин дугоналарим анча сараланиб қолди. Орадан ҳеч қанча вақт ўтмай, машинани сотишимга тўғри келди. Ишонасизми, пиёда юрган пайтимда ёнимда ҳеч ким қолмади. Бундан хафа эмасман. Аксинча вақтида кўзим очилганидан қувондим. Бу дунёда шундай инсонлар билан дўст тутиниш керакки, сизга савобидан бера оладиган инсонлар бўлиши керак. Шу боис дўст танлашда эҳтиёткор бўлиб қолдим. Синаб-синаб танланган дўст ҳақиқий бўлади. Табиатан кўнглим очиқ бўлгани учун ҳаммани ўзимга яқин деб билардим. Ҳаётда ўзимга яқин олиб, ичимдаги гапларни айтгач, худди ўша айтилганларни бошқа бировлардан эшитганман. «Деди-деди»лардан чарчаганим учун охири ўша инсонларга уришмоқчи бўлсанг, гапингни юзимга айт, орқамдан гап тарқатиб юрма, бўлмаса сени «еб қўяман» дедим. Чунки бундай гаплар асабимни еб битирганди. Мен Аллоҳдан бошқа ҳеч кимдан қўрқмайман. Шу боис ҳақиқатни юзига айтаман. Отам раҳматли ҳақ бўлсанг, гапир, ноҳақ бўлсанг, жимгина ўтир деб ўргатган.Мен санъатда дўстим йўқлигидан афсусланмайман. Қўғирчоқ театрида ишловчи Сайёра исмли дугонам бор, ундан бошқа ҳеч ким билан санъатда яқин эмасман.

Баҳора Арслонова, актриса