Суратга бундан 20 йил аввал олинган ва ҳали ҳамон мухлислар учун севимли бўлган фильмлар ҳақида Cosmopolitan нашри маълумот бериб ўтади.
«Узуклар ҳукмдори: Икки қалъа» (The lord of the rings: The two towers)
Питер Жексон трилогиясининг иккинчи қисмида воқеалар биринчи қисмида якунига етган жойдан бошланади. Фродо жамоадан ажралишга қарор қилади, Сем эса унинг ортидан кетади, воқеалар шу аснода ривожланади. Суратга олиш жараёни жуда ҳам қизиқарли кечган. Шлем тепиладиган саҳнанинг бешинчи дублида Вигго Мортенсен оёғининг иккита бармоғини синдириб олган. Аммо айнан мазкур дубль энг яхши деб топилган. Умуман олганда, фильмда нафақат Мортенсен, балки Орландо Блум ҳам жароҳатланган.
«Тутқич бермас фирибгар» (Catch me if you can)
Стивен Спилбергнинг Леонардо Ди Каприо ва Том Хенкс суратга тушган мазкур фильми ҳаётий воқеликка асосланган. Унда Фрэнк Эбигнейл исмли фирибгар ёшлигидан алдаш бобида устасифаранг бўлади. Ота-онаси ажрашганидан кейин уйини тарк этган қаҳрамон ўз «меҳнати» — банк чеклари, турли ҳужжатларни қалбакилаштириш билан кун кўра бошлайди ва бу ҳам етмагандек, катта маблағ тўланадиган ишларга жойлашиб олади. Тез орада ФБР агенти Карл Харнетти унинг бу қилмишларини фош қилишга киришади. Аммо тутқич бермас фирибгар ҳамиша агентдан бир қадам олдинда бўлади.
«Пианиночи» (The Pianist)
Фильм урушнинг барча машаққатларига дош берган, ўтган асрнинг 30 йилларидаги Польшанинг энг яхши пианиночиларидан бири — Владислав Шпилманнинг таржимаи ҳолига асосланган. Ажойиб мусиқа ва таъсирчан воқеаларни ўз ичига олувчи фильм учун 2002 йилда «Олтин палма шохи» мукофоти берилган. Унда бош қаҳрамонни гавдалантирган Эдриан Броуди эса энг яхши актёр сифатида «Оскар»га сазовор бўлган.
«Гарри Поттер ва махфий ҳужра» ( Harry Potter and the chamber of secrets)
2021 йилда «Гарри Поттер» экран юзини кўрганига 20 йил бўлган. 2022 йил эса иккинчи қисм тақдим қилинганининг юбилейи ҳисобланади. «Махфий ҳужра»да Гарри дўстлари билан Хогварцга қайтади. Аммо янги ўқув йили нохуш воқеа билан бошланади. Кимдир жаноб Филчнинг мушугини ўғрилаб, махфий ҳужра ҳақида нома қолдириб кетади. Гарри мактабнинг собиқ ўқувчиларидан бўлган Том Реддлнинг кундалигини топиб олади, унда ушбу ҳужрани Слизериннинг ҳақиқий авлодигина очиши мумкинлиги айтилади. Мактабдаги кўнгилсиз ҳодисаларга нуқта қўйиш учун Гарри ва Рон махфий ҳужрани топиши кераклигини тушуниб етади.
«Фрида»
Ушбу фильм тарихда қолган истеъдод эгаси, мексикалик рассомнинг қисқа, аммо ёрқин ҳаёти ҳақида ҳикоя қилади. Саломатлигида болалигиданоқ муаммо бўлган қизнинг аҳволи 15 ёшидаги автоҳалокатдан кейин янада ёмонлашади. Синган умуртқа тикланиши учун кўплаб жарроҳлик амалиётларини бошдан кечиради. Хиёнаткор, зўравон инсон билан турмуш қургани эса унга янада катта зарба бўлади. Фрида ўз турмушига у билан содир бўлган иккинчи ҳалокат деб таъриф берган.
«Мувозанат» ( Equilibrium)
Сюжетга кўра, Ерда тоталитаризм ҳукмронлик қилади ва барча туйғулар тақиқда бўлади. Унда «эмоционал жиноят қиладиган» барчани жазолайдиган полициячи Жин Престоннинг ўзи кунлардан бир куни қоидаларни бузган шеригини қатл қилишга мажбур бўлиб қолади. Ҳамкасбининг ўлимидан қаттиқ таъсирланиб, унутганига анча бўлган туйғуларни ҳис қила бошлайди. Шундай қилиб, унинг ўзи «эмоционал жиноятчи»га айланади.
«8-мил»
Воқеалар марказида мусиқа оламида оқ ва қора танлилар орасидаги можаролар авж олган бир паллада детройтлик рэпернинг ўз ўрнини топишга бўлган уриниши ётади. Унда бош қаҳрамонни мазкур роли учун МТV Awards’нинг икки мукофотига сазовор бўлган Эминем гавдалантирган. Фильм учун куйлаган Lose yourself қўшиғи эса «Оскар»га муносиб деб топилган.
«Чикаго»
Рокси Харт исмли қиз Велма исмли юлдузга тақлид қилади ва у сингари машҳур бўлишни истайди. Унга яқин бўлиш учун Велманинг менежери эканлигини айтган Фредо исмли киши билан учраша бошлайди. Аммо вақт ўтиб эркакнинг нияти бошқа бўлгани маълум бўлади. Шундан кейин Рокси жаҳл устида Фредони ўлдириб қўяди. Велмa эса параллел равишда эрининг хиёнатидан хабар топиб, унинг ўлимига сабабчи бўлади. Тақдир тақозоси билан уларнинг ҳар иккиси ҳам қамоқхонада учрашиб қолади.
«Ўргимчак одам» (Spider-man)
Мактабда ўқиб, фотографияга қизиқадиган оддий Питер Паркер исмли йигит синфдошлари билан музейга экскурсияга боради. Шунда қўлини ўргимчак тишлаб олади. Эртаси куни уйқудан турган Питер кўриш қобилияти яхшилангани, кучга тўлиб-тошгани ва қўлидан ўргимчак тўри чиқариши мумкинлигини пайқайди. Ўзида кашф қилган ушбу янги қобилиятни жиноятчиларга қарши қўллашга қарор қилади. Шундай қилиб, одамлар ўргимчак одам ва унинг ёвузларга қарши курашиши ҳақида хабар топа бошлайди. Бу режиссёр Сем Раймининг трилогиясидаги ўргимчак одам ҳақидаги илк фильм саналади.
«Ёвузлик қароргоҳи» (Resident Evil)
Франшизанинг биринчи қисмида ҳайҳотдек қўрғонда пайдо бўлиб қолган Элис исмли қаҳрамон ўзига нима бўлганини эслай олмайди. У Umbrella корпорациясининг махфий лабораториясидаги хатолар оқибатларини бартараф этиш учун бинога кирган махсус кучлар гуруҳи томонидан топилади. Хато туфайли ўлимга сабаб бўладиган вирус тарқаб, барча ходимлар зомбига айланган бўлади. Элис вирусни йўқ қилиш учун махсус гуруҳга қўшилиб, ичкарига киради. Фильм шунчалик муваффақиятли чиққанидан яна 5 та қисм суратга олинган.
Изоҳ (0)