Тошкентдан учган иккита самолёт туман сабаб белгиланган аэропортларга қўна олмади

Uzbekistan Airways авиакомпаниясининг Тошкент—Урганч йўналиши бўйича учган HY-051 рейси кучли туман сабаб белгиланган аэропортга қўнишни амалга ошира олмади. Бу ҳақда Telegram’даги «Новости Ташкентского неба» канали хабар берди.

Маълум қилинишича, ушбу рейс Нукус шаҳридаги захира халқаро аэропортига йўналтирилган. Урганч аэропортидаги кучли туман туфайли — кўриш масофаси 200 метр атрофида қолмоқда.

Шунингдек, Uzbekistan Airways матбуот хизматининг маълум қилишича, Термиз аэропортида метеорологик шароит тобора ёмонлашиб бораётгани (туман, кўришнинг етарли даражада эмаслиги) муносабати билан HY-065 Тошкент–Термиз рейси Тошкент аэропортига қайтиб келмоқда.

Рейслар ҳақидаги қўшимча маълумотларни +998(78)140-02-00 рақами орқали олиш мумкин.

Эслатиб ўтамиз, 24 декабрь куни Тошкентдан учадиган самолёт туман туфайли Андижонга қўна олмаган, 29 декабрь куни эса  Наманган ва Андижон аэропортларида кўриш имконияти ёмонлиги сабабли самолётлар учиш ва қўнишни амалга ошира олмаганди. 3 январь куни Урганч ва Нукус аэропортларида кўриш имконияти ёмонлиги сабабли самолётлар учиш ва қўнишни амалга ошира олмаган эди.