Ижтимоий тармоқларда ЙПХ ходимларининг қонуний талабига бўйсунмасдан уларга фаол қаршилик кўрсатаётган икки фуқаронинг видеоси тарқалди. ИИВ ЙҲХББ ахборот хизматининг маълум қилишича, мазкур ҳолат Бухоро вилояти Вобкент тумани марказида содир бўлган.
Маълум қилинишича, 5 январь куни соат 10:30 ларда Вобкент тумани ЙҲХБ ходимлари Абдулла Қодирий кўчасида ўрганишлар олиб борилаётган вақтида инспекторлар Matiz автомобиль ҳайдовчисига тўхташ ишорасини кўрсатган. Бироқ ҳайдовчи инспекторнинг талабига бўйсунмай, ҳаракатланишни давом этган.
Шундан сўнг, ҳайдовчидан автомобилни бошқариш ҳуқуқини берувчи ҳужжатларни кўрсатиш сўралган, бироқ у инспекторларга бирор ҳужжат кўрсата олмаган. Мулоқот давомида инспекторлар ҳайдовчини спиртли ичимлик истеъмол қилганликда гумонлаб, уни тегишли тартибда тиббий кўрикдан ўтишга таклиф қилган.
Мастликда гумонланган ҳайдовчи ҳамда унинг ўғли ЙПХ ходимининг қонуний талабини бажармасдан фаол қаршилик кўрсатган. Охир-оқибат инспекторлар ота-болани тиббий кўрикдан ўтказиб, автомобилни жарима майдонига жойлаштирган.
Мазкур қоидабузарлик шу куннинг ўзида жиноят ишлари бўйича Вобкент туман судида маъмурий тартибга кўриб чиқилган. Суд қарорига кўра, ҳайдовчи Маъмурий жавобгарлик тўғрисидаги кодекснинг 183-моддаси (майда безорилик), 194-модда (ички ишлар органлари ходимининг қонуний талабларини бажармаслик) 1-қисмида назарда тутилган ҳуқуқбузарликни содир этганликда айбли деб топилган ва унга 15 сутка маъмурий қамоқ жазоси тайинланган.
Ҳайдовчининг ўғлига нисбатан эса БҲМнинг 5 баравари (1,35 миллион сўм) миқдорида жарима жазоси тайинланган.
Аввалроқ Қашқадарёда ЙПХ ходимининг фаолиятига қаршилик кўрсатган ҳайдовчи 10 суткага қамалгани, Тошкентда тўланмаган жарималари сабаб қидирувда бўлган Nexia ҳайдовчиси ЙПХдан қочаётганида инспектор ва пиёдани уриб юборгани тўғрисида хабар берилганди.
Мавзуга доир:
Изоҳ (0)