«Калмар ўйини» режиссёри сериалнинг яна икки мавсумини суратга олмоқчи — у Netflix билан келишувлар олиб бормоқда

«Калмар ўйини»нинг бир мавсуми етарли эмас, деб ўйлайдиганлар учун ажойиб янгилик. Сериал режиссёри Хванг Дон Хёк ҳозирда Netflix билан лойиҳанинг иккинчи ва учинчи фаслларини чиқариш имкониятларини муҳокама қилиш учун келишувлар олиб бормоқда.

50 ёшар шоуранер бу ҳақда KBS телеканалига берган интервьюсида айтиб ўтди. Шунингдек, у стриминг хизмати вакиллари билан яқин вақт ичида якуний қарорга келишларини ва натижа ҳақида, албатта, омма олдида маълум қилишини қўшимча қилган.

Хванг аввалроқ биринчи мавсум финали картина учун яхши якун бўлиши мумкинлигини айтган эди, аммо баъзи сюжетлар ноаниқлигича қолган. «Сериалда ошкор этилмаган яна бир қанча воқеалар бор. Мисол учун, полициячи ва унинг акасининг ҳикояси, − дейди у The Hollywood Reporter нашрига. − Агар иккинчи мавсумда ишни тугатсам, ушбу ҳикоя чизиғини ўрганмоқчиман, бу икки ака-ука ўртасида нима бўлади? Кейин Ки Хунга биринчи эпизодда картани берган костюм ёлловчининг ҳикоясини кўриб чиқишим мумкин».

Эслатиб ўтамиз, «Калмар ўйини» сериали 2021 йилнинг сентябрь ойида намойиш этилди. Сюжет қуйидагича: 456 нафар молиявий муаммога дуч келганлар кўп миллионли соврин ютиб олиш умидида сирли ўйинда иштирок этади. Аммо болалар ўйинига ўхшаб кўринган синовлар ҳалокатли бўлиб чиқади: ҳар куни энг кучсиз ўйинчилар ташкилотчилар томонидан аёвсиз тарзда ўлдирилади. Ушбу драма бир зумда томошабинлар ва танқидчиларнинг минглаб ҳайратланарли изоҳларига сабаб бўлди ва Netflix’да энг кўп томоша қилинган сериал сифатида «Брижертонлар» рекордини янгилади.