Йўл ҳаракати қоидаларини бузганлик учун жарималарни ундириш бўйича тизимли ишлар олиб борилмоқда ва мансабдорларнинг хизмат машиналари ҳам бундан мустасно эмас. Бу ҳақда ИИВ матбуот котиби Шоҳруҳ Ғиёсов Фарғонада бўлиб ўтган журналист ва блогерлар билан учрашувда маълум қилди, дея хабар беради «Дарё» мухбири Азизбек Абдувалиев.
Вазирлик мутасаддиси «Дарё» мухбирининг мансабдор шахсларнинг хизмат автомобиллари билан боғлиқ тўланмай келинаётган жарималар ҳақидаги саволига жавобан қуйидагиларни билдирди:
«Бундай ҳолатларга кейинги пайтларда жуда катта эътибор бериляпти. Хусусан, журналист ва блогерлар томонидан. Уларга бунинг учун миннатдорлигимизни билдирамиз. Масаланинг иккинчи томони ҳам бор: айтайлик, жарима ёзилган транспорт воситаси ички ишлар органларига тегишли бўлса, бу ҳолат бўйича маълумот биринчи навбатда шахсий хавфсизлик хизматига етиб келади ва ўрганилади. Агарда ходим охирги зарурат сифатида қоидани бузган бўлса, унга нисбатан чора кўрилмайди. Чунки ходим ўз вазифасини бажариш учун тезкорлик билан воқеа жойига етиб бориши шарт. Агар ўзининг эътиборсизлиги билан боғлиқ бўлса, албатта, жарима тўлайди. Масалан, охирги шундай шов-шувли ҳолат Тошкент вилоятида кузатилди: олтита қоидабузарлиги бор, аммо шундан фақат биттаси чиндан ҳам ўзининг айби билан бўлган. Бу учун жарима тўланади», — деди Шоҳруҳ Ғиёсов.
Ғиёсовга кўра, бугунги кунга келиб республика бўйича йўл ҳаракати қоидаларини бузганлик учун жарималардан қарздорлик 4 миллиард сўмдан ошмоқда.
Изоҳ (0)