Тошкент шаҳар ҳокими Жаҳонгир Ортиқхўжаев халқ депутатлари кенгаши сессиясида мурожаат йўллади. Унда Тошкентда режалаштирилган янги лойиҳалар ҳақида маълумот берди.
«Тошкент шаҳрида хизматлар соҳаси жадал ривожланиб бораётгани ҳеч кимга сир эмас. Бу борада давлатимиз раҳбари олдимизга қатор долзарб вазифаларни белгилаб берганлар.
Топшириқлар ижросини сифатли таъминлаш ҳамда хизматлар соҳасини пойтахтимизда асосий драйверга айлантириш мақсадида 300 нафар ёшларни Франция ва Швейцария давлатларида ушбу соҳада ўқитиб, малакасини оширишга жўнатиш чораларини кўрамиз», — дейди шаҳар ҳокими.
Ортиқхўжаев, шунингдек, пойтахтда Интеллектуал ўйинлар шаҳарчаси барпо этилишини таъкидлади.
«Ёшларнинг янги ташаббусларини қўллаб-қувватлаш мақсадида, ҳурматли президентимиз ташаббусларига асосан, ‘Янги Ўзбекистон’ боғи атрофида ‘Заковат’ клубининг биноси ҳамда Интеллектуал ўйинлар шаҳарчаси барпо этилади.
Шаҳарчада ‘Дунё ёшлари пойтахти — Тошкент’ номли замонавий саёҳат, спорт, IТ, мода, кино, санъат, фестиваллари ташкил этилади», — дейди Жаҳонгир Ортиқхўжаев.
Бундан ташқари, пойтахт ҳокими Тошкентда замонавий, кун-у тун фаолият олиб борадиган Учинчи ренессанс авлодлари номли кутубхона барпо этилишини маълум қилди.
Изоҳ (0)