Янги йил кайфиятини бахш этувчи фильм ва мультфильмлар (фото)

Янги йил кириб келишига ҳеч қанча қолгани йўқ. Байрам шукуҳини ҳис қилишнинг эса ҳозир айни вақти. Уй ва арчани безатиб, мандаринларни аллақачон харид қилган бўлсангиз, демак оила аъзоларингиз билан биргаликда севимли фильмни томоша қилиш қолган холос. Wday нашри байрамона кайфият улашадиган бир-биридан қизиқарли фильм ва мультфильмлар ҳақида маълумот бериб ўтади.

«Уйда ёлғиз», 1990 йил (Home Alone)

Неча ёш бўлишимиздан қатъи назар, Янги йил ва байрам таътилини, турли айёрона усуллар билан ўғриларнинг таъзирини берган тирранча Кевин Маккалистернинг саргузаштларисиз тасаввур қилиб бўлмайди. Қизиқарли сюжет, таъсирли воқеалар ривожи ва бош қаҳрамоннинг «ёмон амакиларни» полицияга тутиб бериш учун қўллаган ҳунарлари томошабинни экран қаршисига михлаб қўяди. Орадан 20 йилдан кўпроқ вақт ўтган бўлишига қарамай, мазкур фильм ҳали ҳам Янги йил арафасида томоша қилиниши керак бўлган энг яхши фильмлардан саналади. «Уйда ёлғиз»нинг биринчи ва иккинчи қисмлари режиссёр Крис Коламбус томонидан суратга олинган, сценарийни эса 80 йиллар хитлари «Нонушта клуби» (The Breakfast Club) ва «Пушти либосдаги ёқимтой қиз» (Pretty in Pink) фильмлари асосчиси Жон Хьюз томонидан ёзилган.

«Олафнинг саргузаштлари», 2017 йил (Olaf’s frozen adventure)

«Муз юрак» фильми ва қорбола Олафни яхши кўрадиган бўлсангиз, унда ушбу қисқа метражли мультфильм айнан сиз учун. Сюжетга кўра, Рождество арафасида Анна ва Эльза ҳар бир оиланинг байрамга хос анъанаси борлиги: кимдир биргаликда десерт тайёрласа, бошқалар уйини безаши яна айримлар, албатта, саунага боришидан хабар топади. Олаф ва маликалар Янги йил анъаналарини топиш учун буғуси билан бирга қироллик бўйлаб саёҳатга отланади ва йўл-йўлакай ҳар бир хонадонда меҳмон бўлади. Ушбу мультфильм қизиқарли сюжетдан ташқари, кулгили саҳналар ва мусиқага бой экани билан ҳам ўзига хосдир.

«34-кўчадаги мўъжиза», 1994 йил (Miracle on 34th street)

1994 йилда суратга олинган «34-кўчадаги мўъжиза» худди шу номли 1947 йилда суратга олинган фильмнинг ремейки ҳисобланади. Воқеалар Сюзан исмли қизалоқ билан Санта Клауснинг танишувига асосланади. Сюзан Санта Клауснинг ҳақиқий эканига ишонмайди, Санта эса буни ёлғон эмаслигини исботлаш учун судга боришга мажбур бўлади. Яхшилик ва дўстлик ҳақида ҳикоя қилувчи ушбу таъсирчан фильм инсонларни мўъжизага ишонишга ундайди.

«Рождестводаги ажойиб ҳикоя», 2017 йил (The man who invented Christmas)

Ден Стивенс суратга тушган мазкур фильмда Чарльз Диккенснинг ҳаёти ҳақида ҳикоя қилинади. Сюжет томошабинни сариқ чақаси қолмаган Чарльзнинг зиқна Скружа ва Рождество арафасида унинг кўзига кўринадиган учта арвоҳ ҳақида ҳикоя қилувчи «Рождество қўшиғи» номли эртак устида ишлаётган даврга етаклаб боради.

«Анастасия»

Россиянинг сўнгги императори Николай II нинг қизларидан бири Анастасия тирик қолганда, унинг тақдири қандай кечган бўларди? Ушбу мультфильмда ижодкорлар мазкур саволга ўзича жавоб бермоқчи бўлганини кўриш мумкин. Ундаги қор билан қопланган шаҳар, қаҳрамонларнинг кийим-кечаклари тамоман қишки муҳитни ўзида мужассам қилади.

«Сент-Луисда кутиб ол, мени», 1944 йил (Meet Me in St. Louis)

Жуди Гарланд бош қаҳрамон ролини ижро қилган «Сент-Луисда кутиб ол мени» ўз жанрининг классикаси ҳисобланиб, Янги йил арафасида томоша қилиш тавсия қилинадиган фильмлардан ҳисобланади. Сюжетга кўра, отасининг лавозими кўтарилгани муносабати билан Смит оиласи 1903 йил Нью-Йоркка кўчиб ўтади. Эстер, унинг опа ва акалари эса дўст ҳамда севикли инсонларини ташлаб, Сент-Луисни тарк этишни истамайди.

«Гринч — Рождество ўғриси», 2000 йил (How the Grinch stole Christmas)

Янги йилни бутун қалби билан ёмон кўрадиган Гринч ҳақидаги фильмда Жим Кэрри қойилмақом рол ижро қилган. «Гринч — Рождество ўғриси» болалар ёзувчиси Доктор Сюзнинг китоби асосида 2000 йил суратга олинган.

«Клаус» (2019 йил)

Испаниялик ижодкорлар томонидан ишланган мультфильм Санта Клаус ва Рождество байрами қандай пайдо бўлгани ҳақидаги ўзига хос версия илгари сурилади. Сюжетга кўра, почта бизнеси билан шуғулланадиган кишининг ўғли Смиренсбург шаҳарчасига почтальон бўлиб ишлаш учун жўнаб кетади. Кунлардан бир куни у болалар ўйинчоқларини ясайдиган уста — Клаус билан танишиб қолади. Айнан унинг ёрдами билан почтальон шаҳар аҳолисининг байрамга бўлган ишончини қайтаришга уринади.

«Соҳибжамол ва махлуқ: Ажойиб Рождество», 1997 йил (Beauty and the Beast: The enchanted Christmas)

Беллнинг махлуқнинг юрагини забт этгани ҳақидаги фильмни кўпчилик яхши билади. Биз эса сизга воқеалари Рождество арафасида юз берадиган давомини ҳам кўришни тавсия қиламиз. Соҳибжамол Белл, сеҳрланган қасрдаги бошқалар билан бирга байрамона зиёфат ташкиллаштиради. Бунинг учун уларга ҳеч ким, ҳатто маккор композитор Форте ҳам қаршилик қила олмайди.

«Санта-Клаус» (1994 йил)

Тим Аллен бош қаҳрамон сифатида кўриниш берган комедияда, Шимолий қутбга бориб қолган оддий ўйинчоқ сотувчиси Санта-Клауснинг ўрнини эгаллашига тўғри келади. Қаҳрамон нафақат янги образга кўникиши, балки байрамни ҳам сақлаб қолиши керак бўлади. Учта қисмдан иборат фильм байрам шукуҳини бахш этишига шубҳа йўқ.