Одил Аҳмедов футболчилик фаолиятини якунлаганини эълон қилди. Аҳмедов бу қарорини «Орзунинг шонли йўли» номли китобининг тақдимот маросимида маълум қилди, деб хабар бермоқда «Дарё» мухбири.
Аҳмедов шу кунгача Хитойнинг «Цанчжоу Майти Лайонс» клуби сафида тўп суриб келаётганди. Унгача эса «Пахтакор» (2006—2011), «Анжи» (2011—2014), «Краснодар» (2014—2016), «Шанхай СИПГ» (2017—2021) каби жамоаларда тўп сурган.
Аҳмедов 2022 йилда Қатарда бўлиб ўтадиган Жаҳон Чемпионатига чиқа олмаганидан кейин 2021 йилнинг 19 июнь санасида терма жамоадаги фаолияти якунланаётганини эълон қилганди. Аҳмедов Ўзбекистон миллий терма жамоасидаги дебют ўйинини 2007 йил 13 октябрда Хитой Тайпейига қарши (9:0) ўтказган. 34 ёшли футболчи мамлакат бош жамоаси сафида 108 ўйинда майдонга тушиб, 20 та голга муаллифлик қилган.
Изоҳ (0)