Наманган вилояти Янгиқўрғон туманида божхона орқали товарларни Қирғизистондан ноқонуний олиб ўтиб бериш учун пора олган профилактика инспектори ишдан олинди. Бу ҳақда вилоят Ички ишлар бошқармаси хабар қилди.
Маълум қилинишича, Янгиқўрғон тумани ИИБ профилактика инспектори 29 январь куни телефон орқали танишига бир неча марта қўнғироқ қилиб, Қирғизистондан ноқонуний равишда ўтказиладиган товарларни махсус дўкон норасмий ходими С.Б. билан «Қизилёзи» маҳалласида жойлашган блокпостдан ўтказилишида ёрдам беришини, бунинг эвазига 700 АҚШ доллари миқдорида пул маблағи олишини айтиб, таклиф билдирган.
Қайд этилишича, у маҳалладоши У.С. билан биргаликда Янгиқўрғон тумани «Мўғол» маҳалласидаги айланма йўллар орқали 2300 килограмм писта меваларини Қирғизистондан ўтказиб, Hyundai-Портер автомашинасида Мўғол—Наманган йўналишида ташиб кетаётган вақтида ҳарбий хизматчилар томонидан ушланган.
Таъкидланишича, профилактика инспекторига тегишли бўлган рақам орқали олиб борилган телефон сўзлашувлари рўйхатини кўздан кечириш жараёнида 29—30 январь кунлари иш бўйича айбланган Д.Т.нинг фойдаланувидаги рақам билан 13 маротаба, У.С.нинг фойдаланувидаги рақам билан 9 маротаба ҳамда С.Б.нинг фойдаланувидаги рақам билан 21 маротаба мулоқотда бўлгани аниқланган.
Ҳолат юзасидан хизмат текшируви тайинланган. Наманган вилоят ИИБнинг 28 апрель кунги қарорига кўра, инспектор ИИО хизматидан бўшатилган.
Мавзуга доир:
- Андижонда кадастр ходимининг 7800 доллар пора билан қўлга тушиши ортидан филиал раҳбари ишдан олинди
- Олмалиқда сотувчиларнинг буюмларини тортиб олган уч нафар солиқ ходими ишдан бўшатилди ва махсус унвонлари бекор қилинди
- Тошкентда маст ҳолда жамоат тартибини бузган ички ишлар органи ходими лавозимидан озод этилди
Изоҳ (0)