Гуччи оиласи Ридли Скоттнинг «Гуччи уйи» фильмини танқид остига олди

24 ноябрь куни премьераси бўлиб ўтган Режиссёр Ридли Скоттнинг «Гуччи уйи» фильми Алдо Гуччи ворисларининг норозилигига сабаб бўлди.

«Фильм ижодкорлари 30 йил давомида компанияни бошқарган Алдо Гуччи ва унинг оила аъзоларини каллакесар, жоҳил, ташқи оламга бефарқ қилиб тасвирлашдан олдин меросхўрлар билан маслаҳатлашишга уриниб ҳам кўрмаган. Бу инсоний нуқтаи назардан жуда ҳам ачинарли ва бугунги кунда брендга асос бўлган меросга нисбатан ҳақоратдир», — дейилади Гуччи оиласининг баёнотида.

https://www.instagram.com/p/CWhFr1AhUOn/?utm_source=ig_embed&utm_campaign=embed_video_watch_again

Фильм Гуччи модалар уйи раҳбари Маурицио Гуччи ва унинг рафиқаси Патрисия Режани ўртасидаги муносабатларга ва аёл уюштирган қотилликка бағишланган. Фильм Сара Гей Форденнинг «Гуччи уйи: қотиллик, телбалик, жозибадорлик, очкўзликнинг шов-шувли ҳикояси» китоби асосида суратга олинган. Асосий ролларни Леди Гага, Адам Драйвер, Жаред Лето, Ал Пачино гавдалантирган.

Гуччининг меросхўрлари, шунингдек, ўз баёнотида оиланинг шаъни ва қадр-қимматини ҳимоя қилишга тайёр эканликларини таъкидлаган. «Гуччи оиласи ўз аждодларининг фаолиятига эҳтиром билан қарайди. Уларнинг хотираси бош қаҳрамонлари аслидан фарқли тасвирланадиган, тўғри бўлмаган спектакль қўйишга лойиқ эмас», — дейилган хабарда.

Аввалроқ Леди Гага «Гуччи уйи» фильмидаги Патрисия Режани ролини ўйнаш учун 9 ой итальянча талаффуз билан гапиргани ҳақида хабар берилганди.