АҚШда «Уйда ёлғиз» фильмидаги Маккалистерларнинг уйи ижарага берилмоқда. Airbnb сайтидаги бу ҳақидаги эълон Кевин Маккалистернинг катта акаси Базз номидан ёзилган.
«Мавсумни Маккалистерлар услубида кутиб олинг. Тарихда биринчи марта шумтакаларнинг бир жамоаси «Уйда ёлғиз» ҳикояси бошланган уйда байрамни нишонлаши мумкин. Маккалистерлар таътилга кетган вақтда Базз тунни ўз болалиги ўтган уйда ўтказади», — деб ёзилади хабарда.
Чикагода жойлашган уйда иккита ётоқхона, Wi-Fi, телевизор ва камин бор. Хоналари Рождествога мос безатилган уйни фақат бир кун — 12 декабрда ижарага олиш мумкин. Уни 7 декабрдан 25 долларга банд қилиш мумкин бўлади. Янги ижарачиларни Базз ролини ижро қилган актёр Девин Ретрей кутиб олади.
Ижарачиларга, шунингдек, «Кевиннинг тузоқлари» ва «Чикагонинг энг яхши пиццаси» таклиф қилинади. Бундан ташқари, улар Disney+ стриминг платформасида 2021 йил ноябрдан пайдо бўлган «Уйда ёлғиз» кинофраншизасининг «Home sweet home alone» номли ремейкини ҳам томоша қилиши мумкин бўлади. Уй ижарасидан тушган маблағлар Чикагодаги La Rabida болалар шифохонасига хайрия қилинади.
Изоҳ (0)