Ҳиндистоннинг Бурханпур шаҳрида истиқомат қиладиган бизнесмен — Ананд Пракаш Чукси 27 яшар рафиқасига Тожмаҳалнинг кичрайтирилган нусхасини совға қилди. Бу ҳақда «Korrespondent.net» хабар берди.
Маълум қилинишича, уч йил давом этган қурилиш ишлари учун 260 минг доллар сарфланган. Ҳашаматли интерьерни ўз ичига оладиган уйда тўртта ётоқхона, ошхона, кутубхона, шунингдек, медитация билан шуғулланишга мўлжалланган алоҳида хона бор.
52 яшар Чукси рафиқасига 24 метр баландликдаги уй туҳфа қилишни истаган, аммо маҳаллий ҳокимият вакиллари бунга рухсат бермаган.
«Мен ушбу жойнинг туризм маркази бўлишини истайман. Аксарият одамлар тўй фотосессиясини уй фонида қила бошлаган», – деган Ананд.
Маълумот учун, Тожмаҳални 1631—1652 йилларда Агра шаҳри яқинидаги Жамна дарёси бўйида Шоҳжаҳон суюкли хотини Аржумандга (Мумтоз Маҳал бегим, Мумтоз Бибика Равза номлари билан машҳур бўлган) атаб унинг вафотидан сўнг қурдирган.
Кейинчалик унинг ўзи ҳам шу ерга дафн қилинган. Ҳинд, форс, араб архитектурасининг юксак намунаси ҳисобланган ҳамда «севги ва садоқатга қўйилган ёдгорлик» дея эътироф этиладиган мақбара 1983 йилда ЮНЕСКОнинг бутунжаҳон мерослари рўйхатига киритилган.
Изоҳ (0)