2021 йилнинг ўтган даврида аёлларга зўравонлик ва тазйиқ ўтказган 1 минг 629 нафар шахсга нисбатан айблов ҳукмлари чиқарилган. Бу ҳақда 26 ноябрь куни ўтказилган халқаро конфренсияда Олий суд судьяси Нодира Ҳакимова маълум қилди, дея хабар бермоқда «Дарё» мухбири.
«Жорий йилнинг ҳисобот даврида аёлларга нисбатан зўравонлик ва тазйиқ ўтказиш билан боғлиқ жами 2 минг 423 нафар шахсга нисбатан 2 минг 12 та жиноят ишлари кўрилган. Шундан, 1 минг 629 нафар зўравонлик ва тазйиқ ўтказган шахсларга айблов ҳукмлари чиқарилган. Бу 67 фоизни ташкил этган.
Бундай жиноятларни содир этгани учун шахсларнинг судланиш кўрсаткичи ҳудудлар кесимида таҳлил қилинди. Зўравонларнинг аксарияти Тошкент, Фарғона, Самарқанд вилоятлари ва Тошкент шаҳрида яшаётгани маълум бўлди.
Жабрланган аёллар ҳам айнан шу ҳудудларда кўпчиликни ташкил этмоқда. 2 минг 300 нафар жабрланган хотин-қизларнинг 353 нафари Тошкент вилоятида, 393 нафари Самарқанд вилоятида, 228 нафари Тошкент шаҳрида истиқомат қилиши аниқланди.
Бу аёлларнинг моддий томонлама мустақиллик жиҳати ўрганилганда, яъни жабр кўрган хотин-қизларнинг 1 минг 976 нафари ёки 86 фоизи ишсиз экани ойдинлашди. Моддий қийинчилик кўпинча оилавий низоларнинг сабабчиси бўлмоқда. Шу боис эркаклар ожиза аёлларга қўл кўтариб, зўравонлик қиляпти», — деди Олий суд вакили.
Ҳакимованинг қайд этишича, бу каби ишларнинг муайяан қисми яраштирув билан тугамоқда, яъни оилалар сақланиб қолинмоқда. 2021 йилнинг ўн ойида 492 та оила яраштирилган.
Мавзуга доир:
- «Аёлларга нисбатан ҳар қандай зўравонлик илдизини қуритиш йўлидаги курашда сизнинг олдингизда бўламан» — Саида Мирзиёева
- «Маҳалла вакилларига ‘агар турмуш ўртоғи ҳақиқатан зўравон бўлса, бундай оилаларни яраштиришга ҳаракат қилманглар’, деб айтиляпти» — сенатор
- Ўзбекистонда гендер зўравонликка қарши 16 кунлик фаол ҳаракатлар кампанияси эълон қилинди
Изоҳ (0)