Ўзбекистонда ҳаво совиши натижасида чекловлар жорий қилинган газ заправкалари жадвали эълон қилинди

17 ноябрдан бошлаб Ўзбекистондаги автомобилларга газ тўлдириш компрессор станцияларига вақтинчалик чеклов ўрнатилгани тўғрисида хабар берилганди. «Gazeta.uz» АГТКШларга газ таъминотининг вилоятлар кесимида чекланиш жадвали билан бўлишди.

Энергетика вазирлиги магистрал ва тақсимловчи газ қувурлари ишида технологик режим бузилишларининг олдини олиш мақсадида автомобилларга газ тўлдириш компрессор шохобчаларида кечки ва тунги вақтлар оралиғида чекловлар жорий қилинишини эслатиб ўтган.

Бундай чора Вазирлар Маҳкамасининг 2018 йил 12 январдаги қарорида кўзда тутилган.

Шу муносабат билан бугунги кунда газ қуйиш шохобчалари фаолиятига бундай чекловлар вилоят ҳокимликлари томонидан тасдиқланган жадвалга асосан жорий қилинмоқда. «Ўзтрансгаз» АЖнинг маълум қилишича, Жиззах вилоятидаги 68 та газ қуйиш шохобчасида соат 17:00 дан 23:00 гача газ таъминоти тўхтатилади. Ушбу жадвал ҳаво ҳарорати кескин пасайганда кучга киради.

АГТКШларга газ таъминотининг вилоятлар кесимида чекланиш жадвали:

• Андижон вилояти — соат 16:00 дан 05:00 га қадар;
• Жиззах вилояти — соат 17:00 дан 23:00 га қадар;
• Навоий вилояти — соат 19:00 дан 06:00 га қадар;
• Наманган вилояти — соат 18:00 дан 06:00 га қадар;
• Самарқанд вилояти — соат 15:00 дан 23:00 га қадар;
• Сирдарё вилояти — соат 17:00 дан 23:00 га қадар;
• Сурхондарё вилояти — соат 17:00 дан 23:00 га қадар;
• Тошкент вилояти — соат 16:00 дан 22:00 га қадар.

Вазирлик вақтинчалик чеклов чоралари ҳаво ҳарорати бироз кўтарилгунга қадар давом этишини ҳамда АГТКШ тез орада аввалги тартибда ишлаш режимига ўтишини қўшимча қилган. Бундан ташқари, чекловлар шохобчаларнинг иш вақтига нисбатан қўлланилади ва ҳажмларга тааллуқли эмас.

Аввалроқ «Дарё» мухбири сўнгги кунларда Фарғона вилоятидаги метан заправкалар олдида навбатлар юзага келишни бошлагани, айрим автомобилларга газ тўлдириш шохобчалари эса вақтинча фаолиятини тўхтатганини маълум қилганди.

Эслатиб ўтамиз, 2021 йилнинг январида Ўзбекистондаги барча газ заправкалари ҳавонинг кескин совиши оқибатида маълум муддат соат 15:00 дан 05:00 гача ёпилганди.