Инсон ёши ва касб-коридан қатъи назар, умрининг сўнггига қадар йўл ҳаракати иштирокчиси ҳисобланади. Йўлларда баъзан ҳайдовчи, баъзида эса оддий йўловчи сифатида ҳаракатланамиз. Икки вазифада ҳам ҳушёрлик ва эҳтиёткорликни қўлдан бой бермаслик шарт. Бўлмаса, оқибати аянчли бўлиши аниқ.
Қуйида даҳшатли йўл-транспорт ҳодисасига учраб, жисмоний ва руҳий саломатлигини тиклай олган ижодкорлар ҳақида маълумотлар келтирилади.
Хосият Ҳусанованинг юзини таниб бўлмасди
Актриса Хосият Ҳусанова 2008 йили жиддий автоҳалокатга учраган. Ўшанда унинг юзи таниб бўлмас даражага келгани, ҳатто шошилинч ёрдам билан касалхонага олиб боришганида аввалига уни танишмагани ҳақида интервьюларида айтган. Шифокорлар актрисага кучли мия чалқалиши ва умуртқа поғонасининг жиддий шикастланиши ташхисини қўйишган. Актриса авариядан сўнг хотираси ва эшитиш қобилияти анча ёмонлашганини айтади.
Жаҳонгир Позилжонов комага тушганди
2009 йил «Божалар» гуруҳи учун оғир келган. Боиси ўша йилнинг 28 июнь санасида «Божалар» гуруҳи вакиллари Термиздаги концерт дастуридан қайтаётган пайтда рулга ухлаб қолиниши сабабли аянчли йўл-транспорт ҳодисасига учраган. Хонанда Мўмин Орипов воқеа жойида вафот этган. Гуруҳ аъзоси Жаҳонгир Позилжонов оғир аҳволда касалхонада ётқизилган ва бир неча кун комада бўлган. У ўзига келганидан сўнг ҳам соғлиғини тиклаши қийин кечган. Оёғи синган хонанда анча пайтгача оқсоқланиб юрган.
Ҳайдовчи рулда ухлаб қолганди
Айни кунларда АҚШда истиқомат қилаётган хонанда Собиржон Мўминов ҳам йўл-транспорт ҳодисасига учраган. 2010 йилнинг айни тўй мавсумида вилоятдан қайтаётганда ҳайдовчининг рулда ухлаб қолиши сабаб машина тўсиққа урилган. Хонанда гипс қўли ва шилинган юзи билан халққа кўринишни истамай, бир муддат омма эътиборидан четда юришга мажбур бўлганди.
«Съёмка»дан қайтаётиб, аварияга учраган
Актриса ва дизайнер Шаҳзода Муҳаммедова кўп йиллардан буён автомобиль бошқаради. У кўп марта шошқалоқлиги сабаб тезликни оширгани учун огоҳлантириш олгани ва жарима тўлаганлигини айтган. 8 йил аввал эса жиддий йўл-транспорт ҳодисасига учраган. Ўшанда у тунги соат 03:00 да суратга олиш майдончасидан қайтаётган бўлган. Ўша пайтдаги Nexia автомобили таниб бўлмас даражага келганлиги ҳақида ОАВда маълум қилинганди. Яхшики, актрисага у қадар жиддий жароҳат етмаган.
Анча вақт юришга қийналди
Хушовоз хонанда Аҳрор Усмонов 2016 йилнинг 22 июнь куни яқинлари билан тоғга дам олиш учун чиқиб кетаётганда мудҳиш аварияга учраган. Машина хонанда Алижон Исоқовга тегишли бўлган, аммо рулда Аҳрор Усмоновнинг аёли бўлган. Тажрибасиз ҳайдовчи сабаб машина йўл четидаги бетонга урилган. Машинадагиларнинг бари жиддий жароҳатлар билан касалхонага ётқизилган. Шифокорлар хонандага тос суягининг синиши ташҳисини қўйишган. Шу боис хонанда уч ой жиддий тартиб даволаниб, ўрнидан қўзғалмаган. Бир йилгача эса юришга қийналган.
Уни машинадан соғ-саломат чиқишига ишонишмаганди
Актриса ва стилист Сўғдиёна Азимова 2019 йил 18 ноябрь куни мудҳиш аварияга учраган. Бу ҳолатга унинг ортидан катта тезликда келаётган Lacetti русумидаги машинанинг урилиши сабаб бўлган. Актрисанинг бир йил аввал харид қилган Lada русумли машинаси таниб бўлмас даражага келган. Гарчи актриса жиддий жароҳат олмаган бўлса-да, узоқ вақт кучли руҳий зўриқиш таъсирида бўлганини кўп бор таъкидлаган. Актриса машина ичида соғ-омон чиқишига ҳеч ким ишонмаганлигини айтади.
Янги йил кечасидаги авариядан эсдалик қолди!
Ёш актёр Абдуллоҳ Масъудов 2019 йилнинг 31 декабрь куни тунги соат 00:02 да мудҳиш аварияга учраган. Катта тезликда келаётган автомобиль стевафорнинг қизил чироғига бўйсунмай, чорраҳа бўйлаб ҳаракатланишни бошлаган Matiz русмли автомобилга келиб урилган. Уни марҳум ижодкор Фатҳулла Масъудовнинг кенжа ўғли Абдуллоҳ бошқараётган эди. Актёрнинг юзидаги чандиқ ҳам автоҳалокатдан ёдгорлик бўлиб қолган. Жиддий жароҳат сабаб у бир неча кун жонлантириш бўлимида даволанган.
Навбатда туриб олинган Spark’да авария учраган
Қизиқчи Аваз Охун автоҳалокат содир бўлган кунни эслашни ҳам истамайди. Чунки у янги, навбатда туриб олган машинасидан ҳам кўра орқа ўриндиқда ўтирган қизининг аҳволидан ташвишланган. У машинасини водийдаги яқинларига кўрсатиб, суюнчи олиш мақсадида оилавий сафарга отланган. Уч кун аввал автосалондан чиққан машинада Тошкентга қайтаётганида Қўқон—Тошкент трассасида мудҳиш воқеа содир бўлган. Бунга Аваз Охуннинг рулда ухлаб қолиши сабаб бўлган. Ҳайриятки, ҳеч ким жиддий жароҳат олмаган.
Қошидаги чизиқ авариядан эсдалик...
Хонанда Жўрабекнинг ижодий танаффусига оз миқдорда бўлса-да, автоҳалокат ҳам сабаб бўлган. У қадар жиддий жароҳат олмаган бўлса-да, авариядан сўнг қўрқув ҳисси ҳеч бир инсонни осонликча тарк этмайди. Хонанданинг қошларидаги чизиқлар ҳам жароҳатдан эсдалик бўлиб қолган.
Изоҳ (0)