Кореянинг машҳур «Калмар ўйини» сериалининг биринчи мавсуми тамоман бошқача якунланиши мумкин эди. Бу ҳақда фильм режссори Хван Дон-Хёк Entertainment Weekly’га берган интервьюсида маълум қилган, деб ёзади «Korrespondent.net».
Лойиҳанинг биринчи мавсуми финалига кўра, ўйинда ғолиб бўлган Сон Ги-хун (456-ўйинчи) қизини кўриш учун АҚШга бориш фикридан қайтган. Самолётга чиқишдан аввал фикрини ўзгартирган қаҳрамон 455 нафар иштирокчининг ўлимига сабаб бўлган ўйиндан ўч олишга қарор қилади.
Режиссёрнинг айтишича, якун учун бошқа сценарий ҳам бўлган. «Аслида биз икки хил, турли якун топадиган сценарий устида тортишганмиз. Ги-хун самолётга ўтириб учиб кетадиган бошқа якун ҳам бор эди. Албатта, у ортга қайтадиган вариант ҳам бўлган. Биз Ги-хуннинг учиб кетишга қарор қилгани ва ўз бахти учун оиласини кўришга бориши дарҳақиқат тўғрими, деб савол берардик ўзимизга. Бу биз сериал орқали етказмоқчи бўлган нома ва савол беришнинг тўғри усули эди», – деган режиссёр.
Натижада биринчи мавсум интрига билан тугаган. Таъкидланишича, нима учун дунё бу ҳолга келди, деган саволга, Ги-хун ортга қайтиб, камерага борсагина, жавоб топиш мумкин, деган қарорга келинган.
«Иккинчи мавсумга алоқали кўплаб изоҳ ва саволлар келиб тушади. Асосий воқеалар ривожи билан боғлиқ бир нарсалар ўйлаб қўйганман. Айни вақтда деталлар ҳақида ўйлаяпман, аммо Netflix билан боғлиқ ҳеч нима аниқлаштирилмаган», – деган у. Аввалроқ «Калмар ўйини» режиссёри сериалнинг давомини суратга олишга ваъда бергани ҳақида хабар берилганди.
Изоҳ (0)