Гидрометеорологик илмий таҳлиллар, об-ҳаво прогнозлари, тадқиқотлар, маърузалар канали Ўзбекистон ва Қозоғистоннинг 5 ноябрь кунининг биринчи ярмида сунъий йўлдошдан олинган тасвири билан бўлишди.
Унда чанг-ғубор ҳодисаси билан боғлиқ хиралик Қозоғистоннинг жанубий вилоятлари, Тошкент, Сирдарё, қисман Жиззах ҳамда Фарғона водий вилоятлари атмосферасини булут мисол қоплаб олганини кўриш мумкин. Шунингдек, тасвирда Сурхондарё вилояти осмонида ҳам бироз хиралик мавжудлиги кўринган.
Канал муаллифининг ёзишича, 6 ноябрь куни ҳам айрим ҳудудларда кўринувчанликни хиралаштирувчи чанг-ғубор сақланади. Республика вилоят марказий шаҳарларида ҳаво ҳарорати 9 даража совуқ 0 даража илиқ оралиқни ташкил этмоқда. Нукус шаҳрида ҳаво ҳарорати 8,8 даража совуқ, Наманган шаҳрида 0,5 даража илиқ. Марказий шаҳарларда ёғингарчилик йўқ. Тошкент ва Нурафшонда туман кузатилмоқда.
Маълумотларга кўра, 6 ноябрь куни республикада ҳаво кам булутли, ёғингарчилик кутилмайди. Ҳудудларга туман тушади.
Ҳарорат кундуз куни шимолда, 1—6 даража илиқ, бошқа ҳудудларда 5—10 даража илиқ, кечқурун шимолда 3—8 даража совуқ, бошқа жойларда 1 даража илиқ 4 даража совуқни ташкил этади.
«Кучли шамоллар кутилмайди. Тошкент, Сирдарё ва Фарғона водий вилояти айрим ҳудудларида чанг-ғубор ҳодисаси сақланади», — дейилади хабарда.
Эслатиб ўтамиз, Сирдарёда 4 ноябрь куни бошланган чанг бўрони кечга бориб Тошкентга ҳам етиб келди. Чанг туфайли атрофни кўриш даражаси чекланди. Автомобильлар ҳаракати секинлашди. Кейинроқ «Ўзгидромет»нинг бунинг оқибатида ҳаводаги чанг миқдори белгиланган меъёрдан 5 баробарга ошганини билдирди. Нафас олишда муаммолар юзага келган пойтахт аҳолиси тиббиёт муассасаларига мурожаат қилишни бошлади, 5 ноябрь куни эса Соғлиқни сақлаш вазирлиги фуқароларга чанг бўронида нималар қилиш бўйича тавсиялар берди.
Изоҳ (0)