Қашқадарё вилояти ҳокими Зоир Мирзаев вилоят раҳбари сифатидаги икки йиллик фаолиятидан сўнг ҳукумат таркибида кўриниш бериши мумкин. Бу ҳақда Зоир Мирзаевнинг «Дарё» мухбири билан суҳбатида сўз борди.
«Дарё» Қашқадарё ҳокими Зоир Мирзаевнинг вилоятда фаолият кўрсатаётганига икки йил тўлиши муносабати билан ҳокимни суҳбатга чорлади.
Зоир Мирзаев суҳбат давомида «Дарё» мухбирининг «Ижтимоий тармоқлар, хусусан, Facebook кузатувчилари орасида сизнинг икки йиллик фаолиятингизни юқори баҳолаган ва эртага, ҳукумат таркибида кўриниш бериб, вилоят раҳбари сифатидаги лавозимингизни тарк этишингиз мумкинлигини ёзишган. Хўш, кузатувчиларнинг фикри қанчалик асосли? Ҳақиқатан ҳам Зоир Мирзаевни ҳукумат таркибида кўрамизми?», деган саволига жавоб берди.
«Ўша фикрларни ўзим ҳам ўқидим. Боиси Facebook’ни доимо кузатиб бораман, Қашқадарё ҳақидаги ҳар бир фикрга эътибор қаратаман. Муаммоларни ёзишса, бу ҳақда ўринбосарларимга топшириқ бериб, ечими билан шуғулланаман. Айнан ўша фикрлар билан бирга вилоятдаги барча ўзгаришларни бир ўзи қилмагандир, ҳали улкан муваффақиятлар демай турайлик, деган фикрларга ҳам кўзим тушди. Турли фикрлар бор, албатта. Аммо мен бир нарсани хоҳлайманки, эртага қайси лавозимда ишлашингиздан қатъи назар, кетганингиздан кейин ўша эски ишлаган жойингиздан кимдир йўқласа, ишингизни тан олиб гапирса ёки телефон қилиб байрамларда табриклаб қўйса, хурсанд бўлингки, сиз одамлар кўнглидан жой олибсиз. Одамларнинг эмас, бир одамнинг бўлса-да, кўнглидан жой олган бўлсангиз бу қувонарли», — дейди Зоир Мирзаев.
Қашқадарё ҳокими, шунингдек, қашқадарёликларга иши қанчалик маъқул келаётгани ҳақида ҳам фикр билдирган.
«Қашқадарё жуда катта эл. Вилоят халқининг кўнглидан чуқур жой олишимизга ҳали анча вақт бор. Аммо ҳаракатдан тўхтамай, буни эплашга уриняпмиз. Биз ҳокимлар Президентимиз топшириғини бажариш баробарида вилоятдагилар билан яхшилаб танишяпмиз. Улардан бирини ака, яна бирини эса ука сифатида таниб, уларнинг оғирини енгил қилишга ҳаракат қиляпмиз», — деган вилоят раҳбари.
Зоир Мирзаев суҳбат давомида Қашқадарё вилоятида раҳбарлик қилишда давом этишини исташини, борини борича қабул қиладиган, борини юзга айтадиган қашқадарёликлар билан ишлашда давом этишга хоҳиши борлигини билдирган.
«Ўзим ҳам бағрикенг, борини борича қабул қиладиган, борини юзга айтадиган, кўнглидан чиқсангиз ҳатто жонини ҳам беришга тайёр қашқадарёликлар билан ишлашда давом этишни хоҳлардим. Қани энди имкони бўлса-ю, қашқадарёликлар билан узоқ вақт ишласам. Лекин барибир раҳбар сифатида ҳар қандай вазифага тайёр турганман. Ва такрор бўлса-да айтаманки, раҳбар сифатида тўрт-беш кишининг юрагида қолсам ёки қилган ишим унинг хотирасида қолса, менга шу кифоя», — деган вилоят ҳокими.
Зоир Мирзаевнинг қўшимча қилишича, унинг айни пайтдаги лавозими раҳбар сифатидаги тўққизинчи мансаби ҳисобланади.
Изоҳ (0)