Фарғона шаҳрида 168 ўринли Президент мактаби фойдаланишга топширилди. Бу ҳақда «Дарё» мухбири Азизжон Эрматов хабар берди.
Президент мактабининг тантанали очилиш маросимида вилоят ҳокими Хайрулло Бозоров, Президент таълим муассасалари агентлиги директори Ҳилола Умарова иштирок этди.
Қайд этилишича, 168 ўринли ўқув биноси ва шунча ўринга мўлжалланган ётоқхона, спорт зали, бассейн, ошхона, спорт майдонлари, 15 ўринли ўқитувчилар меҳмонхонаси Президент мактаблари стандарти асосида қурилган. Фан хоналари, лабораториялар, спорт залларида энг замонавий шароитлар яратилган.
Мактаб синфхоналари жаҳон андозаларига мос ҳолда ҳар бир фан учун махсус жиҳозланган. Хоналарга киришда ўрнатилган электрон доскаларда дарс жадвали, танаффус вақти, ўқитувчи ҳақида қисқача маълумот бериб борилади.
Ўқув жараёни Кембриж университети билан ҳамкорликда ишлаб чиқилган ўқув режа ва дастурлар асосида инглиз тилида амалга оширилади.
Бунинг учун АҚШ, Буюк Британия, Янги Зеландия, Филиппин ва Жанубий Африка каби давлатлардан 10 нафар чет эллик юқори малакали мутахассис танлаб олиниб, дарс машғулотларига жалб қилинган. Шунингдек, 20 нафар тажрибали маҳаллий ўқитувчи ҳам ўқувчиларга сабоқ беради.
Мактабда STEAM фанлари (Science — табиий фанлар, Technology – технология, Engineering – техник ижодкорлик, Аrt – санъат, Mathematics – математика) чуқурлаштириб ўргатилади.
2021 йилда мактабнинг 5–10-синфлари учун ҳужжат топширган 10 мингга яқин ўқувчидан 144 нафари ўқишга қабул қилинган. Ҳар бир синфда 12 нафардан ўқувчи таълим олади.
Бундан аввал Андижонда 168 ўринли Президент мактаби фойдаланишга топширилгани, Шавкат Мирзиёев Қоракўлдаги Халқаро математика мактабини бориб кўргани ҳамда Қаршидаги Президент мактабига ташриф буюриб, ўқувчилар билан суҳбатлашгани ҳақида хабар берилганди.
Изоҳ (0)