Қирғизистон Марказий сайлов комиссияси мамлакат парламенти спикери Талант Мамитовни қонун чиқарувчи органга ноябрь ойида бўлиб ўтадиган қайта сайловларда депутатликка номзод сифатида рўйхатдан ўтказишдан бош тортди. Бу ҳақда МСК матбуот хизматига таяниб, «Интерфакс» хабар берди.

«Талант Мамитов Қирғизистон президенти ва депутатлари сайлови тўғрисидаги конституциявий қонуннинг 21-моддаси талабларига риоя қилмагани учун бўлажак парламент сайловларида депутатликка номзод сифатида рўйхатга олинмади, у ‘Интимак’ (Бирлик) сиёсий партиясидан кўрсатилган номзодлар рўйхатидан чиқариб ташланди», — дейилади хабарда.

МСКнинг тушунтиришича, Қирғизистон президенти ва парламенти депутатлари сайлови тўғрисидаги конституциявий қонунга мувофиқ, номзод давлат сиёсий ходими бўлса, у номзоди кўрсатилган вақтдан бошлаб ўз лавозимини бажаришни ёки расмий ваколатларини амалга оширишни тўхтатади, республика депутати ёки президенти бундан мустасно. Амалдаги қонун ҳужжатларида Қирғизистон парламенти спикери лавозими сиёсий давлат лавозими деб таснифланади.

Қирғизистон парламентига такрорий сайлов 28 ноябрга белгиланган.

Қирғизистонда 11 апрелда ўтказилган референдумда қабул қилинган конституцияга кўра, парламент 90 нафар депутатдан иборат бўлади ва 5 йил муддатга сайланади. Қонунда парламент депутатлари сайловини аралаш сайлов тизими бўйича ўтказиш назарда тутилган. 54 депутат ягона сайлов округида пропорсионал тизим бўйича (сиёсий партиялар номзодларининг очиқ рўйхатида), 36 депутат эса бир мандатли округларда мажоритар тизим бўйича сайланади.

МСК маълумотларига кўра, бир мандатли сайлов округлари бўйича 335 номзод Қирғизистон парламентига сайловда иштирок этиш учун ҳужжатларнинг тўлиқ пакетини топширган. Шунингдек, 21 та сиёсий партия МСКга 1 минг 46 кишидан иборат номзодлар рўйхатини тақдим этди.

Марказий сайлов комиссияси тақдим этилган ҳужжатларнинг қонунга мувофиқлигини 28 октябрь сўнгигача текширади. 29 октябрдан Қирғизистонда сайловолди ташвиқоти даври бошланади.

12 октябрь куни Қирғизистон президенти Садир Жапаров Вазирлар Маҳкамасини истеъфога чиқарганди. Ундан аввал Жапаров «Қирғизистон Республикаси Вазирлар Маҳкамаси тўғрисида»ги конституциявий қонунга имзо чеккан. Қонунни имзолаш билан бирга, Садир Жапаров ўз ваколатларини сезиларли даражада кенгайтирди. Ҳужжатга кўра, Жапаров ўз ташаббуси билан бош вазир ва Вазирлар Маҳкамаси аъзоларини истеъфога чиқариши мумкин.