Хоразм вилояти Божхона бошқармаси тезкор тузилмалари ва вилоят Давлат хавфсизлик хизмати ходимлари ҳамкорлигида ўтказилган тезкор тадбирда ноёб металларнинг ноқонуний айланмасига чек қўйилди. Бу ҳақда Давлат божхона қўмитаси хабар берди.
Урганч шаҳрида аввалдан кузатувга олинган шахс оғирлиги 1,22 килограмни ташкил қилувчи 1 дона платина қуймаси ва салкам 514 грамм оғирликдаги заҳарли симоб моддасини сотишга уринган вақтида ушлаб қолинган.
Аниқланишича, у платина қуймасини 30 минг долларга, симобни ҳар бир грамини 1000 доллардан ҳисоблаб, жами 500 минг долларга сотмоқчи бўлган.
Қайд этилишича, қонунбузар шахсдан белгиланган тартибда олиб қўйилган ноёб металларнинг умумий қиймати 1 миллиард 128 миллион 510 минг сўмни ташкил этган.
Ҳозирда ҳолат юзасидан божхона органлари томонидан терговга қадар текширув ҳаракатлари олиб борилмоқда.
Эслатиб ўтамиз, Навоийда 25 минг долларга сохта симоб сотаётган шахслар қўлга олингани хабар қилинганди. Шунингдек, Бухорода 540 грамм симобни 50 минг долларга сотаётган шахслар ушлангани ва Қашқадарёда ярим килодан ортиқ симобни 3 минг долларга сотишга уринган шахс қўлга олингани маълум қилинган.
Изоҳ (0)