Тошкентда Nexia қарама-қарши йўналишга чиқиб кетиб, Spark’ка урилиши оқибатида йўловчи ҳалок бўлди

Тошкент шаҳрининг Олмазор туманида содир бўлган йўл-транспорт ҳодисаси оқибатида бир киши ҳалок бўлди, деб хабар беради ИИВ ЙҲХББ ахборот хизмати.

Маълум қилинишича, 22 октябрь куни соат 08:10 ларда туманнинг Қамарнисо кўчасида 19 ёшли А.Б бошқарувидаги Nexia-3 автомобили йўл ҳаракати қоидаларини бузган ҳолда қарама-қарши йўналишга чиқиб кетган. Натижада машина 1958 йилда туғилган фуқаро бошқарувидаги Spark билан тўқнашув содир этган.

Авария оқибатида Spark ичида бўлган 53 ёшли йўловчи олган тан жароҳатлари сабаб вафот этган.

Ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-модда (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган. Ҳозирда тергов ҳаракатлари олиб борилмоқда.

Аввалроқ Қўйлиқда Isuzu автобуси ва икки енгил автомобиль тўқнашгани, Тошкентда Lacetti қайрилиб олишга уринган Mercedes-Benz автобусига келиб урилгани, Тошкентда Spark ойнасидан танасини чиқариб, тик турган ҳолатда «съёмка» қилган шахс жавобгарликка тортилгани тўғрисида хабар берилганди.