Фарғона вилоятида тадбиркорга энергетик ичимлик дилерлигини ваъда қилиб, уни чув туширган шахсга жиноят иши қўзғатилди, деб хабар беради Бош прокуратура ҳузуридаги Департамент.
Маълум қилинишича, Департаментнинг Олтиариқ туман бўлими томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилган. Текширув давомида Қ.З. исмли шахс тадбиркор С.нинг ишончига кириб, унга Flash энергетик ичимлиги дилерлиги ва катта миқдорда ичимликларни олиб беришни ваъда қилгани аниқланган. У тадбиркорнинг 189,6 миллион сўм ва 7,5 минг долларини фирибгарлик йўли билан қўлга киритган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Аввалроқ Қашқадарёда ўзини прокуратура ходими деб таништириб, одамларни чув туширган собиқ ИИБ ходими ва унинг шериги қўлга олингани, Facebook’да ўзини Коррупцияга қарши курашиш агентлиги ходими сифатида таништирган шахс фуқарони 11 минг долларга чув туширгани, Тошкентда Мудофаа вазирлигига тегишли бинонинг таъмирлаш ишларини олиб бериш эвазига қурилиш фирмаси бошлиғидан 30 минг доллар олаётган шахслар ушлангани тўғрисида хабар берилганди.
Изоҳ (0)