Нью-Йоркда 300 метр баландликда шаффоф полга эга ақл бовар қилмас даражада чиройли томоша майдончаси очилди (фото)

Нью-Йоркда ҳайратланарли диққатга сазовор янги маскан — шиша полга эга 305 метр баландликдаги томоша майдончаси пайдо бўлди, деб хабар беради Esquire.

Summit One Vnderbilt номини олган томоша майдончаси Манхэттен марказидаги Мидтаун осмонўпар биносида жойлашган. Уни Kohn Pedersen Fox архитектура фирмаси ишлаб чиққан бўлиб, лойиҳа қиймати 3,3 миллиард долларни ташкил этади.

Ташриф буюрувчилар учун майдонча расман 21 октябрь куни очилади.

Аттракцион 1200 фут баландликда (364 метр) очиқ террасани ўз ичига олган бўлиб, унга шаффоф лифтда кўтарилиш мумкин. Лифт 305 метр баландликни 42 сонияда босиб ўтади. Ҳар бир лифтнинг майдони 8,3 квадрат метрни ташкил этади, бу шиша полга эга дунёдаги энг тез юрар лифт ҳисобланади.

Томоша майдончасининг «Левитация» номли бўлимида япониялик рассом Яёи Кусаманинг «Булутлар» номли кўргазмаси бўлиб ўтмоқда.

Шунингдек, минорада Kenzo Digital номи билан танилган ҳайкалтарошнинг «Ҳаво» инсталляциясини учратиш мумкин.

Шиша полга эга томоша майдончаси осмонўпар бинонинг охирги тўрт қаватини эгаллаган.

Минорадан Нью-Йоркнинг ақл бовар қилмас гўзаллигини томоша қилиш мумкин.

One Vanderbuilt осмонўпар биноси 2020 йилнинг сентябрида очилган эди. У 77 қаватдан иборат бўлиб, баландлиги 427 метрни ташкил этади.

Аввалроқ Лондонда 35 метрли баландликда Sky Pool номли шаффоф тубга эга бассейн очилгани тўғрисида хабар берилганди.