Лукашенко Беларусга ҳужум қилинган тақдирда Россия билан иттифоқ тузишини маълум қилди

Ташқи душман ҳужум қилган тақдирда, Беларусь Россия билан «ягона ҳарбий база»ни яратади. Бу ҳақда республика президенти Александр Лукашенко Американинг CNN телеканалига берган интервьюсида айтиб ўтди.

«Агар керак бўлса, Беларусь сизнинг тажовузингизга қарши туриш учун Беларусь ва Россиянинг ягона базасига айланади. Агар сиз ёки қайсидир қўшни давлат тўсатдан шундай қарор қилмоқчи бўлсангиз, буни яхшилаб тушуниб олишингиз керак», — деди Лукашенко америкалик журналистга.

Президентнинг сўзларига кўра, низо келиб чиққан тақдирда, Беларусни «Россия қуролли кучларининг бутун ғарбий қисми» қўллаб-қувватлайди. Унинг таъкидлашича, ғарбий йўналишда Россия ва Беларусь аслида ягона армия яратган, унинг асосини Беларусь қўшинлари ташкил этади. «Аслида, биз узоқ вақтдан бери Беларусь ва Россия Иттифоқи давлатининг олд постимиз», — деди президент.

Шу билан бирга, сиёсатчининг таъкидлашича, Беларусда хорижий ҳарбий базалар, жумладан Россия базалари йўқ. Лукашенко республикада «фуқаролик мақсадларидаги» иккита база борлигини тасдиқлади. «Биринчиси, сизнинг ҳудудингиздан ядровий ракеталар учирилишини олдиндан аниқлаш учун Совет Иттифоқи даврида қурилган базадир. Иккинчиси, Россия Қуролли Кучлари ўзининг Атлантика океанидаги флоти билан боғланадиган алоқа базаси », — деди у.

Президентнинг сўзларига кўра, мазкур базаларда фақат бир-иккита россиялик зобит хизмат қилади, қолган ходимлар беларуслик.

2015 йил сентябрь ойида Россия президенти Владимир Путин Беларусда Россия авиабазасини яратиш тўғрисидаги битимни имзолашни буюрганди. Беларусда бунга қарши норозилик намойишлари бошланиб кетди, шундан сўнг Лукашенко бу ҳақда ҳеч қандай гап бўлмаганини айтиб, Россия ҳарбий базасини тузишдан бош тортди.

CNN’га берган интервьюси давомида Лукашенко, агар Беларусь устидан хорижий авиакомпанияларнинг самолётлари учса, уларнинг хавфсизлиги кафолатланишини айтди. Шу билан бирга, у агар Беларусь хавфсизлигига таҳдид сезилса, мамлакат ҳукумати ҳар қандай рейсни бўйсундириши ва қўндиришини айтди.

«Агар бизнинг ҳудудимиз устидан учишдан қўрқсангиз, мен шахсан сиз ва сизнинг компаниянгизга, мамлакатингизга ва бошқа ҳар қандай давлатга Беларусь устидан парвоз тўлиқ хавфсиз бўлишига кафолат бераман. Ҳар доим шундай бўлган. Аммо агар мен ва ҳуқуқ-тартибот органлари Беларусь давлатига таҳдид кўрсак, ҳар қандай самолётни бу ерга қўндирамиз. Агар биз хавфни сезсак, у Беларусда дарҳол қўлга олинади», — деди президент.

Лукашенконинг таъкидлашича, инқирозли вазиятда бошқа давлатлар ҳукумати ҳам худди шундай йўл тутади. Президентнинг сўзларига кўра, Беларусь мамлакат бўйлаб учишдан қўрқаётган хорижий компанияларнинг рейси бўлмаса ҳам уддалайди. Унинг фикрича, Европа давлатлари «Вашингтон буйруғидан кейин» республика устидан учишдан бош тортди.

Президентнинг қўшимча қилишича, Беларусь махсус хизматлари Ryanair самолёти билан боғлиқ воқеада иштирок этмаган. Сиёсатчи бундай фикрни уйдирма деб атади.

«Агар сиз айтгандек, бу бизнинг махсус хизматлар томонидан режалаштирилган ҳаракат бўлганда, сиз ошириб юборяпсиз. Чунки, махсус хизматлар томонидан бундай операцияни амалга ошириш ва ҳеч қандай халқаро қонунларни, ҳатто кўрсатмаларни бузмаслик катта харажат талаб қилади. Бизнинг махсус хизматлар, ҳатто сизники ҳам бунга тайёр деб айтолмайман», — деди Лукашенко.

Эслатиб ўтамиз, 23 май куни Беларусь ҳукумати Ryanair авиакомпаниясининг Афинадан Вильнюсга учаётган самолётини шошилинч равишда Минскка қўнишга мажбур қилганди. Самолёт йўловчилари орасида мухолифатчи ва Nexta Telegram каналининг собиқ бош муҳаррири Роман Протасевич ҳам бор эди. Протасевич ва унинг севгилиси — Россия фуқароси Софя Сапега аэропортда қўлга олинган.