Швеция—Швейцария ҳамкорлигидаги АBB инжиниринг компанияси электромобиллар учун мўлжалланган дунёдаги энг тезкор қувватлаш қурилмасини тақдим этди. Теrrа 360 номини олган қурилманинг қуввати 360 киловаттни ташкил этади. Унга тўрттагача автомобиль батареяларини бир вақтда улаш мумкин, у модель туридан қатъи назар, аккумуляторни 15 дақиқа ичида тўлиқ қувватлантиради, деб хабар беради Motor.
Теrrа 360 ҳар қандай электрокарнинг батареясини 100 километр масофага ҳаракатланиш учун етадиган қувват билан уч дақиқадан камроқ вақт ичида тўлдира олади. АBB режаларига кўра, 2021 йил охирига қадар илк ўта тезкор қувватлантириш терминаллари Европада, 2022 йилда эса АҚШ, Лотин Америкаси давлатлари ва Осиё—Тинч океани минтақасида пайдо бўлади.
АBB ёки Asea Brown Boveri автомобиллар батареяларини қувватлантириш билан 2010 йилдан бери шуғулланади — ўшандан буён дунёнинг 88 дан ортиқ мамлакатига 406 мингдан ортиқ қурилма сотган. АBB ўз ихтиросини энг илғор деб атамоқда, аммо 2019 йилда Repsol нефть ва газ компанияси Бискайя провинциясига 400 киловаттли станцияни ўрнатганди. Бу каби терминал ёрдамида 10 дақиқа ичида электрокар батареясини тўлиқ қувватлантириш мумкин, аммо бирорта серияли электрокар ҳозирга қадар бундай қувватни кўтара олмайди.
АBB’нинг Теrrа 360 қурилмаси ўз кўрсаткичлари билан бугунги кундаги моделларга мос келади. Масалан, Genesis GV60 электоркари 350 киловаттни қабул қила олади.
Изоҳ (0)